Sýbsıdııalaýdyń biryńǵaı memlekettik aqparattyq júıesi fermerler úshin tegin bolady
«Agroónerkásip kesheni damýynyń turaqtylyǵyn saqtaý maqsatynda sýbsıdııalaýdyń jańa tetigin engizýdi 2023 jyldyń 1 qańtaryna aýystyrý týraly sheshim qabyldandy», - dedi E. Qarashókeev.
Onyń aıtýynsha, kókónister men qant qyzylshasyn óndirý men óńdeý jónindegi ınvestıtsııalyq jobalardy iske asyrýǵa qosymsha 8,3 mlrd teńge bólinedi. Bul qarajat zamanaýı sýarý júıelerin satyp alýǵa, qajetti ınfraqurylymdy tartýǵa jumsalatyn bolady.
«Sondaı-aq aýyl halqynyń tabysyn arttyrý jónindegi jobanyń aýqymyn ulǵaıtý aıasynda óz bıznesin ashý jáne isin jańa bastaǵan kásipkerlerdiń qyzmetin keńeıtý maqsatynda aýyldyq eldi mekender men shaǵyn qalalardyń turǵyndaryna mıkrokredıt berýge 40 mlrd teńge bólý josparlanǵan. Bul eń keminde 8 myń jumys ornyn qurýǵa múmkindik beredi», - dedi mınıstr.
«Sýbsıdııalaýdyń biryńǵaı memlekettik aqparattyq júıesi ázirlendi, ol fermerler úshin tegin bolady jáne barlyq negizgi memlekettik derekqorlarmen ıntegratsııalanady. Júıeniń barlyq is-qımyldary avtomattandyrylady, bul sýbsıdııalardy bólý jáne berý kezinde sybaılas jemqorlyq táýekelderin barynsha azaıtýǵa múmkindik beredi. Júıe Aqmola oblysynda pılottyq rejımde testileýden ótip, onyń qorytyndylary boıynsha júıeni pysyqtaý jumystary aıaqtalyp jatyr», - dedi vedomstvo basshysy.
Aıta keteıik, búgin Májilistiń jalpy otyrysynda óńirlerge shyǵý barysynda QR Parlamenti Májilisiniń depýtattaryna kelip túsken azamattardyń ótinishterin memlekettik organdardyń qaraý nátıjeleri talqylanyp jatyr. Depýtattardyń óńirlerge saparlary barysynda kóterilgen eki myńǵa jýyq suraq Úkimet tarapynan jan-jaqty saraptalyp, qaraldy.
Sondaı-aq otyrysta Erbol Qarashókeev kóktemgi dala jumystaryna daıyndyq barysyn baıandady.
Azyq-túlik kelisimshart korporatsııasynyń forvardtyq satyp alý baǵdarlamasy arqyly 80 mlrd teńge kóleminde jeńildetilgen kredıtpen qamtamasyz etilgen. Bul rette, aǵymdaǵy jyly forvardtyq satyp alý kólemi 2 esege artty.
