Sýbsıdııalar tek jumys isteıtinderge ǵana beriledi - Elbasy
ASTANA. QazAqparat - Memleket basshysy Nursultan Nazarbaev aýyl sharýashylyǵy salasyndaǵy memlekettik sýbsıdııalardyń tek jumys isteıtin sharýalarǵa ǵana beriletinin taǵy bir márte eskertti, dep xabarlaıdy QazAqparat tilshisi.
«Qazirgi kezde aýyl sharýashylyǵyn damytý úshin trıllıondaǵan aqshany berip jatyrmyz. Sýbsıdııalar texnıkaǵa, tyńaıtqyshqa, sýarmaly jerlerge, sosyn sút, et, qant jáne taǵy basqa salalarǵa bólinedi. Búginde sol sýbsıdııalardyń barlyǵyn jınap, basqasha taratý qajet. Eger de seniń qolyńnan kelse, sýbsıdııany saǵan berý kerek», - dedi Nursultan Nazarbaev otandyq buqaralyq aqparat quraldaryna bergen suxbatynda.
Prezıdent sózinde memlekettik sýbsıdııalar keıbir sheneýnikterdiń «astaýyna» aınalǵandyǵyn, barlyǵynyń sol jerden aqshany qarpyp alýǵa tyrysatyndyǵyn atap ótti. Sol sebepti sýbsıdııalardy bólý júıesi qaıta qaralmaqshy.
«Shynynda da, keń baıtaq jerimiz bar. Bir gektardan alatyn bıdaıymyz eń kóp degende 13,5 tsentner, dál sondaı jerden myna turǵan Qytaı 25 tsentner alyp otyr. Eger biz 13 tsentnerdiń ústinen taǵy 5 tsentner qosyp alatyn bolsaq, onda taý-taý bıdaıdyń astynda qalamyz», - dep atap kórsetti Elbasy.
Aıta keteıik, búgin respýblıkalyq arnalarda kórsetilgen baǵdarlama barysynda Memleket basshysy xalyqtyń kókeıinde júrgen kóptegen suraqtarǵa jaýap berdi. Sonyń ishinde «Prezıdenttik kreslodan sharshaǵan joqsyz ba?» degen saýal da bar .
Budan bólek, Nursultan Nazarbaev jer salasyndaǵy reformanyń tıimdiligin qarapaıym mysalmen túsindirip berdi.
