Sýbsıdııalanatyn jumys oryndaryn uıymdastyrý qaǵıdalaryna engizilgen ózgerister nelikten toqtatyldy
ASTANA. KAZINFORM — Sýbsıdııalanatyn jumys oryndaryn uıymdastyrý qaǵıdalaryna engizilgen ózgerister osy jyldyń 1 sáýirine deıin ýaqytsha toqtatyldy. Munyń sebebin Májilis depýtattarynyń saýalyna bergen jaýabynda Premer-mınıstrdiń orynbasary — Mádenıet jáne aqparat mınıstri Aıda Balaeva túsindirdi.
— Sýbsıdııalanatyn jumys oryndary, onyń ishinde qoǵamdyq jumystar, aýyldyń jumyssyz turǵyndaryn qoldaýdyń mańyzdy quraly bolyp qalýda. Eńbek jáne halyqty áleýmettik qorǵaý mınıstrligi sýbsıdııalanatyn jumys oryndarynyń tıimdiligin arttyrý, onyń ishinde jalǵan jumyspen qamtýdy boldyrmaý, bıýdjet shyǵysyn ońtaılandyrý maqsatynda 2025 jyly sýbsıdııalanatyn jumys oryndaryn uıymdastyrý qaǵıdalaryna ózgerister engizdi. Ózgerister Bas prokýratýra men Sybaılas jemqorlyqqa qarsy agenttigi anyqtaǵan zań buzýdy aldaǵy ýaqytta boldyrmaý, bıýdjet qarajatyn jymqyrý faktileriniń aldyn alý maqsatynda qabyldandy, — dedi vıtse-premer.
Onyń málimetinshe, atalǵan buıryqpen:
— sýbsıdııalanatyn jumys oryndaryn uıymdastyrǵysy keletin jumys berýshilerge qoıylatyn talaptar kúsheıtildi;
— jumys berýshilerdiń túrleri boıynsha qoǵamdyq jumystardy uıymdastyrý úshin qurylatyn ýaqytsha jumys oryndarynyń shekti mánderi belgilendi;
— jumys berýshilerdiń sýbsıdııalanatyn jumys oryndaryn aıaqtaǵan azamattardy turaqty jumysqa ornalastyrý boıynsha jaýapkershiligi bekitildi;
— eńbek mobıldiligi ortalyqtarynyń «Azamattarǵa arnalǵan úkimet» memlekettik korporatsııamen sýbsıdııalanatyn jumys oryndaryna qatysýshylarǵa jalaqy tóleý bóliginde ózara is-qımyl jasaý tártibi aıqyndaldy.
— Engizilgen ózgeristerge qatysty keıbir úkimettik emes uıymdar, Mańǵystaý oblysy, Almaty qalasyndaǵy jumyssyzdar tarapynan túsinbeýshilik boldy. Osyǵan baılanysty 2026 jylǵy 6 qańtardan bastap engizilgen ózgeristerdiń qoldanysy 2026 jylǵy 1 sáýirge deıin ýaqytsha toqtatyldy. Qazirgi tańda sýbsıdııalanatyn jumys oryndary burynǵy sharttar boıynsha uıymdastyrylyp jatyr. Eńbek mınıstrligi engizilgen ózgerister boıynsha halyq arasynda belsendi aqparattyq túsindirý jumystaryn júrgizip jatyr, — dedi Aıda Balaeva.
Buǵan deıin elimizdiń aýyldaryndaǵy resmı jumyssyzdardyń sany 162,3 myń adam ekenin jazǵan edik.