Sýbsıdııalanatyn jumys oryndaryn iske asyrý tártibine ózgeris engizilip jatyr
ASTANA. KAZINFORM — Qazir eńbek naryǵynda 7 800-den astam kásip suranysqa ıe. Bul týraly búgin Úkimet otyrysynda Eńbek jáne halyqty áleýmettik qorǵaý vıtse-mınıstri Asqar Bıahmetov málim etti.
— Jyl basynan beri 196 myńnan astam adam jumyspen qamtýǵa járdemdesýdiń belsendi sharalarymen qamtamasyz etildi. Qazirgi tańda sýbsıdııalanatyn jumys oryndaryn iske asyrý tártibine, sondaı-aq granttar berý qaǵıdalaryna ózgeris engizilip jatyr. Engiziletin ózgerister tıimdilikti arttyrýǵa, jumyspen qamtýǵa járdemdesý sharalaryna kózdelgen qarajattardy nysanaly jumsaýǵa baǵyttalǵan, — dedi Asqar Bıahmetov.
Onyń aıtýynsha, qazir mınıstrlik kásibı kadrlar daıarlaýǵa júıeli qadam jasaý úshin Ulttyq biliktilik júıesin belsendi túrde damytyp otyr. Bul eńbek naryǵynyń talaptarynyń tez ózgerýi jaǵdaılarynda erekshe mańyzǵa ıe.
— Qazir eńbek naryǵynda 7 800-den astam kásip suranysqa ıe. Olardyń ishinde kásiptik standarttarmen 4500-ge jýyǵy qamtamsyz etilgen, 864 kásiptik standart ázirlendi. Bilim berý júıesin eńbek naryǵynyń talaptaryna jaqyndatý úshin qazir bilim berý baǵdarlamalaryn kásiptik standarttarǵa teńestirý júrgizilip jatyr. Búginde olardyń negizinde 11 myń bilim berý baǵdarlamasy jańartyldy. Budan bólek, Daǵdylardyń tsıfrlyq banki engizilip jatyr. Kásiptik standartty ázirleý protsesterine jasandy ıntellektini engizý kelesi qadam bolady. Bul eńbek naryǵyndaǵy ózgeristerdi jedel taldaýǵa, protsesterdi ońtaılandyrýǵa jáne standarttardy ýaqtyly jańartýǵa jol ashady, — dedi vıtse-mınıstr.
Budan buryn habarlanǵandaı, jastardyń eńbek naryǵyna kelýi jylyna 360 myń adamǵa deıin ósedi.