Sýbsıdııalanatyn jumys oryndary: jumys berýshilerge jańa mindetter júkteledi

ASTANA. KAZINFORM — Eńbek jáne halyqty áleýmettik qorǵaý mınıstrligi sýbsıdııalanatyn jumys oryndaryn uıymdastyrý jáne jalaqyny sýbsıdııalaý qaǵıdalaryna ózgerister engizý týraly vedomstvo basshysynyń buıryq jobasyn ázirledi.

Bul jańartýlar rásimderdiń ashyqtyǵyn arttyrýǵa, bıýdjet qarajatyn tıimdi paıdalanýǵa jáne memlekettik jumyspen qamtý baǵdarlamalaryna qatysýshylardy naqty eńbekpen qamtýdy qamtamasyz etýge baǵyttalǵan.

Negizgi ózgeristerdiń biri – sýbsıdııalanatyn jumys oryndaryna qatysýshylardyń baǵdarlama merzimi aıaqtalǵannan keıin turaqty jumysqa qabyldanýyn jumys berýshilerdiń mindeti retinde bekitý. Eger jumys berýshi ótken jyly 10 jáne odan kóp sýbsıdııalanatyn jumys ornyn uıymdastyrǵan bolsa, ol qatysýshylardyń keminde 10%-yn shtatqa qabyldaýǵa tıis; al oryn sany az bolǵan jaǵdaıda – keminde bir adamdy turaqty jumysqa ornalastyrýy qajet. Bul rette jańa ótinim bergenge deıingi alty aı ishinde olar úshin mindetti zeınetaqy jarnalary turaqty aýdarylyp otyrǵan azamattar ǵana esepke alynady. Sonymen qatar, dáleldi sebeptermen ýaqytsha jumys istemeıtin qatysýshylar esepke alynbaıdy: áskerı qyzmetin ótep júrgender, bala kútimi boıynsha demalystaǵy azamattar, oqýdy jalǵastyratyndar, el aýmaǵynan tys jerde júrgender, sondaı-aq múgedektigi bar adamdar, qaıtys bolǵan, habar-osharsyz ketken nemese áreketke qabiletsiz dep tanylǵandar. Osylaısha, memleket sýbsıdııalanatyn jumys oryndaryn ýaqytsha emes, turaqty jumyspen qamtýdy qamtamasyz etýge baǵyttap otyr.

Kelesi mańyzdy ózgeris – jumys berýshilerdiń talaptarǵa sáıkestigin Elektrondyq eńbek bırjasy arqyly avtomatty tekserý tetigin engizý. Bul eńbek mobıldiligi ortalyqtarynyń ótinimderdi tehnıkalyq baǵalaýǵa qatysýyn boldyrmaı, jumyssyzdardy sýbsıdııalanatyn jumys oryndaryna ornalastyrýdy tolyq tsıfrlandyrýǵa jol ashady.

Júıe aǵymdaǵy jyl ishinde memlekettik granttar nemese mıkrokredıtter alǵan, kásibı oqytýǵa qatysatyn, ınfraqurylymdyq jobalar boıynsha memlekettik satyp alýlar aıasynda qyzmet kórsetetin, bilim berý memlekettik tapsyrysyna nemese tegin medıtsınalyq kómektiń kepildendirilgen kólemi men mindetti áleýmettik medıtsınalyq saqtandyrý júıesinde medıtsınalyq qyzmetter kórsetýge qatysatyn uıymdardyń ótinimderin avtomatty túrde qabyldamaıdy. Buǵan «Jastar praktıkasy», «Áleýmettik jumys oryndary» jáne «Kúmis jas» jobasy baǵyttary boıynsha berilgen ótinimder ǵana kirmeıdi. Sondaı-aq quryltaıshylary nemese basshylarynyń JSN-y sáıkes keletin birneshe jumys berýshiniń bir mezette baǵdarlamaǵa qatysýyna tyıym salynady.

Basqa ózgeristerdiń qataryna baǵdarlamaǵa qatysý úshin jumys berýshilerge qoıylatyn talaptardyń kúsheıtilýi kiredi. Atap aıtqanda, jumys berýshiniń árekettegi zańdy tulǵa nemese jeke kásipker mártebesi bolýy, keminde 12 aı boıy qyzmetin júzege asyrýy, jalaqy boıynsha merzimi ótken beresheginiń bolmaýy, sońǵy bir jyldaǵy áleýmettik tólemderdi turaqty aýdarýy, jalǵan kásipkerlikke nemese adal emes salyq tóleýshiler tizimine engizilmeýi qajet. Jumys berýshi buryn jasalǵan kelisimsharttar boıynsha mindettemelerin oryndaýǵa tıis, bankrottyq nemese taratý rásiminde bolmaýy kerek jáne qyzmetkerlermen elektrondyq eńbek sharttary durys rásimdelgen bolýy qajet.

Engiziletin ózgeristerdiń taǵy biri – túrli sanattaǵy jumys berýshiler uıymdastyra alatyn qoǵamdyq jumystar sanynyń naqty rettelýi.

Jobada kelesi shekter belgilengen:

- áleýmettik kásipkerliktiń birinshi sanattaǵy sýbektileri úshin – 1-den 10 jumys ornyna deıin;

- aktsıonerlik qoǵamdar, JShS jáne olardyń fılıaldary úshin – 1-den 5-ke deıin;

- jeke kásipkerler, qojalyqtar men fermerlik sharýashylyqtar úshin – 1-den 5-ke deıin;

- úkimettik emes uıymdar úshin – 1-den 5-ke deıin;

- memlekettik uıymdar, onyń ishinde kentter men aýyldyq okrýgter ákimdikteri úshin – 1-den 5-ke deıin.

Belgili bir áleýmettik talaptar oryndalǵan jaǵdaıda osy lımıtter eki ese ulǵaıtylýy múmkin. Bul – múgedektigi bar adamdarǵa, múgedek bala tárbıelep otyrǵan ata-analarǵa, kópbalaly otbasylarǵa jáne memlekettik marapattarǵa ıe analarǵa arnalǵan jumys oryndaryn uıymdastyrýǵa, sondaı-aq jumys berýshiniń qatysýshylar jalaqysynyń keminde jartysyn qosa qarjylandyrýyna nemese ótken jylǵy qoǵamdyq jumystarǵa qatysýshylardyń keminde 60%-yn shtatqa qabyldaýyna qatysty. Bul normalar jumys berýshilerdi áleýmettik jaýapkershilikke jáne halyqtyń osal toptarynyń jumyspen qamtylýyn keńeıtýge yntalandyrady.

Buıryq alǵash resmı jarııalanǵannan keıin 10 kún ótken soń kúshine enedi. Jańartylǵan qaǵıdalar sýbsıdııalanatyn jumys oryndaryn turaqty jumyspen qamtýǵa bastaıtyn naqty kópirge aınaldyrýdy kózdeıdi. Bul ózgerister jumyspen qamtý baǵdarlamalarynyń tıimdiligin arttyryp, jumys berýshiler arasynda adal básekelestikti qamtamasyz etip, áleýmettik qoldaý tetikterine qoǵamnyń senimin kúsheıtedi. 

Aıta ketelik jyl basynan beri 296 myń adamǵa qoldaý kórsetilgeni týraly jazǵan edik.