Sýbsıdııalanatyn ıpotekalyq oblıgatsııalar kólemi 1,7 trln teńgege deıin ulǵaıtyldy
ASTANA.KAZINFORM — Ónerkásip jáne qurylys mınıstri keıinnen ıpotekalyq turǵyn úı qaryzdaryn berý úshin shyǵarylatyn oblıgatsııalar boıynsha kýpondyq syıaqy mólsherlemesin sýbsıdııalaý qaǵıdalaryna ózgeris engizdi.
Jańartylǵan talaptarǵa sáıkes, oblıgatsııalar shyǵarý arqyly qarajat halyqqa jeńildetilgen ıpoteka berýge baǵyttalady.
Turǵyn úıge muqtaj retinde esepte turǵan áleýmettik osal toptaǵy azamattar úshin ıpotekalyq nesıe mólsherlemesi jyldyq 7 paıyz bolady.
Al kezekte turǵan basqa azamattarǵa, sondaı-aq Qazaqstan azamattary men qandastarǵa ıpoteka jyldyq 9 paıyzben beriledi.
Negizgi ózgeristerdiń biri — sýbsıdııalanatyn oblıgatsııalar kóleminiń ulǵaıýy. Endi olardyń jalpy somasy 1,7 trln teńgeden aspaýy tıis. Buǵan deıin birinshi jyly 300 mlrd teńgege deıin, keıingi jyldary 200 mlrd teńgege deıingi oblıgatsııalardy sýbsıdııalaý qarastyrylǵan edi.
Sondaı-aq oblıgatsııalardyń aınalym merzimi 8 jyldan aspaýy kerek. Olar boıynsha kýpondyq syıaqy mólsherlemesi Ulttyq banktiń bazalyq mólsherlemesinen joǵary bolmaýy tıis. Alaıda ýákiletti organnyń kelisimimen oblıgatsııalar ornalastyrylǵan nemese qosymsha ornalastyrylǵan kúni bul mólsherlemeni 1,5 paıyzdyq tarmaqqa deıin kóterýge bolady.
Sonymen qatar sýbsıdııalaý týraly kelisim, sýbsıdııa alýǵa arnalǵan usynys pen ótinim nysandaryna da ózgerister engizildi.
Buıryq 2026 jylǵy 1 shildeden bastap kúshine enedi.
Buǵan deıin Qazaqstanda jeńildetilgen ıpotekanyń úlesi 85 paıyzǵa deıin artqany habarlanǵan bolatyn.
