Sýbsıdııaǵa sengen qyzylordalyq fermerler nesıeni 25,5%-ben tóleýge qınalyp otyr
QYZYLORDA. KAZINFORM – Qyzylorda oblysynda mal sharýashylyǵymen aınalysatyn kóptegen sharýa qojalyǵynyń tóraǵalary mal basyn kóbeıtýge baǵyttalǵan memleket qoldaýynyń toqtap qalǵanyna shaǵym bildirdi.
Fermerler byltyr «Agrobıznes» baǵdarlamasy aıasynda «Agrarlyq nesıe korporatsııasy» AQ qarajaty esebinen nesıe seriktestikteri arqyly 25,5 paıyzben, ıaǵnı baǵdarlama talabyna sáıkes nesıe mólsherlemesi syıaqysynyń 6 paıyzyn sharýashylyq tólep, qalǵan syıaqysy bóligin memleket sýbsıdııalaıtynyn eskerip, tórt túlik basyn kóbeıtý úshin nesıe rásimdegen.
Múmkindikti qalt jibergisi kelmeı múlkin kepildikke qoıǵan. Sýbsıdııalaıtyn qarajattyń bolmaýyna baılanysty sol nesıeni tórt-bes aıdan beri endi ózderi tólep keledi. Gosagro.kz portaly arqyly ótinish berý de múmkin bolmaı tur.
- Aýyl sharýashylyǵy mınıstriniń 2018 jylǵy 26 qazandaǵy №436 buıryǵyna sáıkes bıýdjette qarajat bolmaǵan jaǵdaıda sýbsıdııa tóleý kelesi jyldyń qarjysyna aýystyrylatyny, ótinishter tek bıýdjette qarajat barda ǵana júzege asyrylatyny kórsetilgen. Osyǵan baılanysty 2026 jyly memleketten qarjy bólinedi degen úmitpen, ıaǵnı 2025 jyldyń tórtinshi toqsanynda alǵan nesıemizdi tólem kestesine sáıkes óteý bizge qıyn.
Nesıe mólsherlemesiniń paıyzy joǵary bolǵandyqtan alǵan malymyzdy satýǵa májbúrmiz, - delingen bir top fermer qol qoıǵan hatta.
Nesıe syıaqysyn ýaqytyly tóleı almaǵan soń ósimpul esepteledi, bul da - jyǵylǵanǵa judyryq. Syıaqy mólsherlemesin sýbsıdııalaýǵa qarajat jetkiliksiz bólingendikten aı saıyn nesıe paıyzyn tóleý sharýalardyń kúnkórisine keri áserin tıgizip tur.
- Mysaly, men 1 mln teńge tóleýim kerek bolsa, ol 25,5 paıyzben 4 mln 300 myń teńge bolady. Aıyrmashylyǵy jer men kókteı. «Balapandy kúzde sanaıdy» degendeı, mal jylyna bir tóldeıdi. Onyń ishinde turaqtamaıtyny bar, sonda orta eseppen 100 bas maldan jylyna kem degende 30-40 shaqty tól týady. Myna jaǵdaıda 25,5 paıyz degenińiz aqylǵa syımaıdy. Keıbir sharýashylyqtar jabylýdyń sál aldynda tur, - dedi «Syr syıy» sharýa qojalyǵynyń tóraǵasy Nurlan Bımanov.
Sharýalar men nesıe seriktestikteri arasyndaǵy kelisimshartta «sýbsıdııa bolmasa da tóleımin» degen tarmaq bar kórinedi. Alaıda, ony eskergen eshkim bolmapty. Jappaı qol qoıǵan. Sondyqtan sottasqan kúnniń ózinde jeńilip qalatyny anyq.
Qyzylorda oblystyq aýyl sharýashylyǵy jáne jer qatynastary basqarmasynyń basshysy Talǵat Dúısebaev kásibin dóńgeletkisi keletinderdi sýbsıdııaǵa senip qalmaýǵa, qomaqty nesıege urynyp qalmaýǵa shaqyrdy. Qazirgi kúni ony bıýdjettiń shamasy kótermeıtinin ashyp aıtty.
- Buryn qarjy ınstıtýttary ótinish bergende bıýdjette aqsha bolmasa da rezerv qarastyrylatyn. 2025 jyldyń qazan aıynan bastap qarjynyń taýsylýyna baılanysty ótinish qabyldaý toqtady. Respýblıka boıynsha syıaqy mólsheri úshin qaryz 600 mlrd teńgege jetti. Bul degenińiz – bir oblystyń bıýdjeti. Búgingi kúni birde-bir oblys jańadan ótinish qabyldap jatqan joq. Muny men resmı túrde málimdeımin. Basqa oblystar qazir 2023-2024 jyldardyń qaryzyn tólep jatyr. Bizdiń oblysta ondaı qaryz bolǵan joq. Oblys ákimi Murat Ergeshbaev Parlamentte júrgende bul máseleni Májilis minberinde kóterdi. Jaqynda sharýalardyń shaǵymymen aımaq basshysynyń qabyldaýynda boldym. Sonda kelesi aıda bıýdjet naqtylanatynyn, sol kezde birinshi kezekte osy máseleni sheshýge áreket jasalatynyn atap ótti. Onda da múmkindigine qaraı, - dedi ol.
Kazinform tilshisi buǵan deıin oblystyq aýyl sharýashylyǵy jáne jer qatynastary basqarmasynan mal sharýashylyǵyna memleketten qandaı kómek baryn surap bilgen edi.
