Sýbsıdııa jergilikti organdardyń «astaýyna» aınalǵan - Prezıdent
ASTANA. QazAqparat - Sýbsıdııa jergilikti organdardyń «astaýyna» aınalǵan. Búgin Úkimettiń keńeıtilgen májilisinde Qazaqstan Prezıdenti Nursultan Nazarbaev osylaı aıtty, dep habarlaıdy QazAqparat.
«Sýbsıdııa bólý birizdendirilýi tıis. Sizder sýbsıdııany qalaı paıdalanatyndaryńyzdy bilmeımin. Biraq, maǵan sýbsıdııa jergilikti organdar men atalǵan aqshany alatyn kompanııalar úshin «astaýǵa» aınalǵany týraly málimetter jetýde. Tıimdi paıdalanylmaıdy. Bul aqshany kim qadaǵalaıdy? Memlekettiń aqshasy. Qozy-Kórpesh, múmkin sen olardyń qaıda ketip jatqanyn anyqtarsyń»,- dedi Elbasy Esep komıtetiniń tóraǵasy Jańbyrshınge.
«Biz qarap jatyrmyz», - dedi óz kezeginde Esep komıtetiniń tóraǵasy.
Osy oraıda Nursultan Nazarbaev Bas prokýratýra men Esep komıtetine sýbsıdııaǵa bólingen qarjynyń qalaı kádege jaratylatyndyǵyn tyńǵylyqty tekserýdi tapsyrdy.
«Munyń barlyǵy da salanyń áli kúnge deıin tıimsiz basqarylatyndyǵyn kórsetedi. Asqar Myrzahmetovke júktelgen tapsyrmalardy qamtamasyz etýdi, jaǵdaıdy túzeýdi tapsyramyn. Agroónerkásip keshenin damytýdyń negizgi baǵyttaryn biz birge anyqtadyq. Solaı ǵoı. Bekittik, aıttyq. Buǵan qosa, astyqty úsh óńirdiń ákimderimen problemaly agroholdıngter boıynsha kelisilgen sheshimdi 1 naýryzǵa deıin ázirleýdi tapsyramyn. Bul «QazEkspoAstyq» pen «Ivolgaǵa» qatysty. Ne isteý kerek? Qarańdar, shara qoldanyńdar», - dedi Memleket basshysy.
