Sýbsıdııa tólenbegen: Almatyda avtobýs tapshylyǵy týyndaýy múmkin
ALMATY.KAZINFORM — Almatyda jeke tasymaldaýshy kompanııalar sýbsıdııa tólemi keshiktirilgendikten, avtobýstardy azaıtty.
Áleýmettik jelide avtobýs tasymaldaýshy 23 kompanııanyń 2 qarashadan bastap avtobýstar sanyn qysqartý týraly ótinishi tarady. Olar avtobýs sanyn 30%-ǵa qysqartatynyn aıtady.
Sebebi olarǵa sýbsıdııa tólenbegen. Ákimdiktiń jeke avtobýs kompanııalary aldyndaǵy bereshegi shamamen 15 mıllıard teńgege jetti.
Sonyń saldarynan kólik kompanııalary janarmaı men qosalqy bólshekter jetkizýshilerine qaryz bolyp qalǵan.
Sońǵy túsken sýbsıdııa qarajaty negizinen qyzmetkerlerdiń jalaqysyn tóleýge, salyq pen áleýmettik aýdarymdardy óteýge ketken.
Almaty qalasynyń jol qozǵalysyn uıymdastyrý jáne jolaýshylar kóligi basqarmasy tasymaldaýshylarǵa sýbsıdııanyń qalǵan bóligin tóleýden bas tartpaıtynyn málimdedi.
Basqarma tasymaldaýshylarǵa bekitilgen josparǵa sáıkes avtobýstardyń tolyq quramda shyǵýyn qamtamasyz etý qajettigi týraly eskertý joldaǵanyn málimdedi.
Al sýbsıdııa máselesi qalalyq bıýdjetti kezekti naqtylaý kezinde qaralady deıdi.
— 2026 jyldyń basynan beri bıýdjet qarajatyn tıimdi paıdalaný maqsatynda sýbsıdııa kólemin kezeń-kezeńimen ońtaılandyrý jumystary júrgizilip keledi. Atap aıtqanda, jolaýshylar aǵyny eskerilip, keıbir avtobýs baǵyttarynyń qozǵalys kestesi ózgertilgen. Jyl boıy sýbsıdııa boıynsha esep aıyrysý buryn qoldanysta bolǵan jáne keıin túzetilgen qarjylandyrý kólemine sáıkes júrgizilgen, — delingen habarlamada.
Málimdeýinshe, marshrýttar jelisine, avtobýstardyń tolymdylyǵyna jáne jolaýshylardyń naqty aǵynyna taldaý jasalyp jatyr.
Sondaı-aq jolaqy tóleminiń deńgeıin arttyrý jáne jolaýshylar esebiniń dáldigin qamtamasyz etý úshin biryńǵaı baqylaý-jelilik qyzmetin engizý qolǵa alynǵan.
Eske salsaq, Almaty ákimdigi avtobýs reısteri nelikten qysqartylǵanyn túsindirgen edi. Qalada avtobýstardyń jumys kestesi ózgertildi.
