Sýbsıdııa qaryzyn 2026 jyldyń naýryzyna deıin tolyq óteımiz – AShM
ASTANA. KAZINFORM – Aýyl sharýashylyǵy mınıstri Aıdarbek Saparov Úkimet otyrysynan keıin ótip jatqan baspasóz máslıhatynda 2022 jyldan beri qordalanyp qalǵan sýbsıdııa qaryzy qashan tolyq óteletinin aıtty.
- Memlekettik qoldaý retinde berilý kerek 340 mlrd teńge kútý paraǵynda tur. Onyń bári 100 paıyz óteledi. Jyl saıyn osylaı, aldaǵy jyldyń bıýdjetinen ótken jyldan aýysqan qaryzdar ótelip otyrady. Bıyl da solaı. Eger qosymsha qarajat únemdelip jatsa nemese bıýdjet qaıta qaraý kezinde qarjy shyqsa, Úkimet bóledi. Qazirdiń ózinde 57 mlrd teńge qosymsha bólip, óńirlerge úlestirdi. Qalǵany kelesi jyldyń qańtar, aqpan, naýryz aılarynda óteledi, - dedi ol.
Onyń sózinshe, atalǵan 340 mlrd teńge borysh 2022, 2023 jyldardan aýysqan.
- 2024 jyldan beri sýbsıdııanyń ornyna kredıt engizgenimizdi bilesizder, - dedi Aýyl sharýashylyǵy mınıstri.
Aıta keteıik, Qazaqstan bıyl 16 mln gektar alqaptan 27,1 mln tonna astyq aldy.