Sýbsıdııa alǵan sharýalarǵa azyq-túlik boıynsha jaýapkershilik júktelmegen - senator
«Biz azyq-túlik naryǵyndaǵy qalyptasqan jaǵdaıdyń kúrdeli ekenin túsinemiz. Degenmen, agrarlyq derjava bola tura, aýyl sharýashylyǵy ónimderiniń negizgi túrlerin eksporttaýshy álemdik 10 memlekettiń qataryna kire otyryp, azyq-túlik ınflıatsııasynyń deńgeıi boıynsha kóptegen elderdiń aldynda turǵanymyz syn kótermeıdi. Bul - salada júıeli problemalardyń bar ekendigin kórsetedi. Senat depýtattary egin jınaý boıynsha statıstıkalyq málimetterdiń, azyq-túlikti tutynýdyń qabyldanǵan fızıologııalyq normalarynyń shynaıy jaǵdaıǵa sáıkes kelmeıtinine birneshe ret Úkimet nazaryn aýdarǵan bolatyn», - dedi A. Kúrishbaev.
Sonymen qatar ol memleketten sýbsıdııa alyp otyrǵan otandyq sharýalarǵa ishki naryqty azyq-túlikpen qamtamasyz etýde eshqandaı jaýapkershilik júktelmeıtinin aıtty.
«Basqa agrarlyq elderge qaraǵanda, bizde azyq-túlik klasterleri damymaǵan. Azyq-túlik ınflıatsııasynyń sebepterin ımporttyq taýarlarynyń qymbattaýymen túsindiremiz. Shyn máninde, bul árdaıym solaı bola bermeıdi. Máselen, kórshilerimizde bizdiń basty daqylymyz – bıdaıdan bastap, aýyl sharýashylyǵy ónimderiniń kóptegen túrleriniń ózindik quny tómen. Nege bulaı? Sebebi biz agrarlyq salany ǵylymı qamtamasyz etý boıynsha olardan edáýir artta qalyp otyrmyz. Bir mysal keltireıin, sońǵy 15 jyl ishinde Reseıde jazdyq bıdaıdyń ónimdiligi 30% - ǵa ósti, al bizde tek 15%, ıaǵnı eki ese az», - dedi senator.
Budan bólek depýtat elimiz aýyl sharýashylyǵy óndirisine qajetti tehnologııanyń negizgi bóligin shetelden satyp alatynyn aıtty.
«Qazirgi kezde bıdaı sorttarynyń 60-70%-yn, al birqatar daqyldar boıynsha 100%-yn ózge elderden ákeletin jaǵdaıǵa keldik. Ashyǵyn aıtsaq, eger Reseı tuqym eksportyna tyıym salsa, Soltústik Qazaqstan suryptyq materıalsyz qalady. Qazir Qazaqstannyń agrarlyq ǵylymy ábden quldyrap ketti. Byltyr agrarlyq ǵylymı zertteý ınstıtýttary bıýdjettik qarjyny tek qyrkúıekte (ıaǵnı, 8 aıdan keıin) aldy. Al bıyl ǵalymdar mamyr aıynyń sońyna deıin jalaqysyz otyrdy. Kezinde sheteldik áriptestermen birlesip, álemdik úzdik tájirıbeni eskere otyryp, Shortandyda halyqaralyq agrarlyq-ǵylymı ortalyqty jáne zamanaýı agrarlyq-zertteý ýnıversıtetterin uıymdastyrý jobalary ázirlengen bolatyn. Alaıda olardyń barlyǵy Úkimetten qarjylyq qoldaý tappady. Búginde dúkenderdegi taýarlardyń baǵalaryna qarap biz mundaı saıasattyń qaıda ákelgenin kórip otyrmyz», - dedi A. Kúrishbaev.