Sý basqan kóshe men metro: almatylyqtar jańbyrdan keıingi jaǵdaıǵa shaǵymdanyp jatyr

Tolassyz jaýǵan jańbyr saldarynan qala kóshelerin sý basyp, turǵyndardyń júris-turysy qıyndady. Áleýmettik jelide qalyptasqan jaǵdaıǵa baılanysty shaǵym aıtqan turǵyndardyń jazbasy kóp. Máselen, jeli qoldanýshylarynyń biri kóshe abattandyrylyp, aryqtardyń beti jabylǵanymen, nátıjesi nashar bolǵanyn jazǵan. Onyń aıtýynsha, jańbyrdan keıin kóshe sýǵa tolyp, jaıaý júrginshilerge kedergi keltirgen.

— Almaty, bizde qarapaıym jańbyrdan keıin kóshe ózenge aınalatyn bolǵan ba, — delingen jazbada.

Raný esimdi turǵyn Abaı dańǵyly men Jarokov kóshesiniń qıylysyndaǵy jaǵdaıdy kórsetti. Beınejazbadan kósheniń tómengi bóliginde sý jınalyp qalǵanyn kórýge bolady.

— Jarokov kóshesiniń ózenge aınalatynyn jyl saıyn jazyp kelemiz, — dep jazdy ol.

Endi bir turǵyn Han-Táńiri shaǵynaýdany, Energetıkalyq kóshesindegi jaǵdaıdy jelide jarııalady. Sýretten jol ortasynda opyrylyp túsken asfalt baıqalady.

Bul jazbaǵa Bostandyq aýdanynyń ákimdigi jaýap berdi. Olar jaýyn-shashyn saldarynan topyraq shógip, jol jabyny zaqymdanǵanyn jáne qazir atalǵan ýchaskege ınertti materıaldar tóselgenin atap ótti.

— Jol ýaqytsha qalpyna keltirildi jáne avtokólik qozǵalysy qamtamasyz etildi. Aýa raıy turaqtalǵannan keıin merdiger uıym asfalt-beton jabynyn qaıtadan tolyq qalpyna keltiredi. Jaǵdaı Bostandyq aýdany ákimdiginiń baqylaýynda, — dep habarlady aýdan ákimdigi.

Osyǵan uqsas jaǵdaı Nur-Alataý shaǵynaýdanynda bolǵan. Jelide jarııalanǵan sýretterden birneshe jolda kólikterdiń jolda batyp qalǵanyn kórýge bolady.

Jarııalanymǵa pikir bildirgen Bostandyq aýdanynyń ákimdigi bul ýchaskelerde sýmen jabdyqtaý jáne kanalızatsııa jelilerin tartý jumystary aıaqtalǵanyn málimdedi. Al asfalt-beton jabynyn qalpyna keltirý keıingi jumys kezeńderi aıasynda qarastyrylǵan.

— Tolassyz jaýyn-shashyn saldarynan topyraq batyp, nátıjesinde bul aýmaqta avtokólik batpaqqa keptelip qaldy. 11 qarasha saǵat 11:30–daǵy jaǵdaı boıynsha avtokólik shyǵarylyp, jol ashyldy. Ýchaske talapqa saı ustalmaǵandyqtan, aıyppul salý túrindegi ákimshilik hattama toltyryldy, — delingen ákimdik jaýabynda.

Odan bólek jeli qoldanýshylarynyń bir toby qalalyq metronyń Alataý beketindegi jaǵdaıdy kórsetti. Stansa kireberisin tolyqtaı sý basqan.

Bul jaǵdaıǵa baılanysty metropolıtenniń baspasóz qyzmeti túsinikteme berdi. Resmı jaýapqa sáıkes, qalalyq sý burý jelisiniń tolýyna baılanysty Abaı dańǵylynan tómen ornalasqan «Alataý» metro stantsııasynyń soltústik jaıaý júrginshiler ótkelin sý basqan. Qazir onda metropolıten qyzmetkerleri jınalǵan sýdy soryp alý jáne aýmaqty tazalaý jumystaryn júrgizip jatyr.

— Sý basý saldaryn joıý jumystary jalǵasyp jatyr. Jaǵdaı tıisti qyzmetterdiń baqylaýynda. Bul rette «Alataý» metro stantsııasy shtattyq rejımde jumys istep tur. Jolaýshylarǵa qyzmet kórsetýde shekteýler joq, — delingen metropolıten jaýabynda.

Al Aıgerim esimdi turǵyn jelide Maqataev pen Baıtursynov kósheleriniń qıylysyndaǵy, sondaı-aq Seıfýllın dańǵylyndaǵy jaǵdaımen bólisti. Ol kóshemen qatar jaıaý júrginshilerin sý basqanyn jazǵan.

Ózge jeli qoldanýshysy Seıfýllın dańǵyly men Shevchkenko kóshesiniń qıylysynda jańbyrdan keıin jaqynda salynǵan tósemtas zaqymdanǵanyn kórsetti.

Qala ákimdigi ne deıdi

Almaty ákimdigi «Qazgıdromet» málimetine silteme jasap, 11 qarasha saǵat 10:00–degi jaǵdaı boıynsha qalada 23 mm, Medeý aýdanynda 26 mm jaýyn-shashyn túskenin habarlady. Odan bólek kommýnaldyq qyzmet kúsheıtilgen rejımde jumys istep jatqany atap ótildi.

Kommýnaldyq ınfraqurylym jáne turǵyn úı ınspektsııasy basqarmasynyń málimetinshe, túnde qalanyń birneshe aýdanynda sý jınalǵany anyqtalǵan. Qolaısyz aýa raıynyń saldaryn boldyrmaý jáne joıý úshin jalpy sany 1 579 adamnan quralǵan 85 jedel brıgada kezekshilikke shyqqan.

Jumysqa 415 tehnıka men 97 motopompa jumyldyrylyp, 2 950 qum salynǵan qap daıyndalǵan. Táýlik boıǵy jumysqa 3 253 jol salasynyń jumysshysy tartyldy.

— Sınoptıkterdiń boljamynsha, 11 qarashada jańbyr kúni boıy oqtyn-oqtyn jaýady. Taǵy 10 mm-ge deıin jaýyn-shashyn túsýi múmkin. 12 qarashada jaýyn-shashynsyz aýa raıy boljanyp otyr, tuman túsýi múmkin. Qala turǵyndaryna qolaısyz aýa raıynda jolda abaı bolyp, kólik jyldamdyǵyn azaıtý usynylady. Sondaı-aq kólikterdi sý jınalýy múmkin aýmaqtarǵa qoımaý kerek. Qatty jel kezinde aǵashtardyń jáne jarnama qurylymdarynyń mańynda júrmegen jón, — dep eskertti ákimdikten.

Eske salaıyq, keshe Almaty ákimdigi kommýnaldyq qyzmet kúsheıtilgen jumys rejımine kóshkenin habarlady.

Buǵan deıin Almatyda turǵyndardyń biri toby kóshedegi aryqtardyń betin jabýǵa qarsy bolyp, qarsy petıtsııa jarııalanǵanyn jazǵanbyz. Petıtsııada aryqtardy jappaý qajettigin dáledeıtin 8 ýáj keltirildi. Olar qalalyq ortada temperatýranyń kóterilýi, jasyl jelekterge zııany, aýa aınalymynyń buzylýy, sý basý qaýpi, el zańnamasyn buzý, halyqaralyq tájirıbe jáne t. b.

Jaqynda Almatydaǵy Sátbaev kóshesinde aryqtardyń taqtalarmen jabylýy da turǵyndar nazarynan tys qalǵan joq. Bul jaǵdaıǵa da nazarylyq bildirgender boldy.