Sýbarýdyń astynda qalǵan 52 jastaǵy áıel jansaqtaý bóliminde jatyr
ALMATY. QazAqparat - Almatyda dárigerler Subaru Tribeca kóliginiń astynda qalǵan adamdardyń hal-jaǵdaıy týraly aıtty, dep habarlaıdy QazAqparat tilshisi.
Jol apatynan 5 adam japa shekken bolatyn.
Qalalyq Densaýlyq saqtaý basqarmasynyń baspasóz qyzmeti habarlaǵandaı, oqıǵa ornynda 4 jedel járdem brıgadasy jumys jasaǵan.
«52 jastaǵy áıeldiń jaǵdaıy aýyr. Jansaqtaý bóliminde jatyr. 29 jastaǵy jáne 53 jastaǵy áıelderdiń jaǵdaıy ortasha dep baǵalanyp otyr. Olardyń biri - neırohırýrgııa, ekinshisi travmatologııa bólimine jatqyzyldy», - dedi baspasóz qyzmetinen.
Balalarǵa da qajetti medıtsınalyq kómek kórsetildi.
«Eki bala balalarǵa arnalǵan shuǵyl medıtsınalyq járdem berý ortalyǵyna jetkizildi. 4 jastaǵy bala neırohırýrgııa bólimine jatqyzyldy. Onyń jaǵdaıy orta dárejede. 10 jastaǵy balany da mamandar tekserip shyqty. Ony jatqyzýǵa qajettilik bolmaǵan soń úıine ambýlatorııalyq em alýǵa jiberildi».
Aıta ketý kerek, jol oqıǵasy búgin boldy. Subaru Tribeca kóligin júrgizip kele jatqan jas qyz 5 jaıaý júrginshini qaǵyp ketken edi.
Kýágerlerdiń aıtýynsha, Subaru Beregovoı kóshesimen ońtústik baǵytqa qaraı kele jatqan. Ol Jandosov kóshesine qaraı oń jaqqa burylǵan. Sol ýaqytta joldy kesip ótip bara jatqan úsh áıeldi, eki balany basyp ketken. Balalardyń jasy 4 pen 10 jas aralyǵynda. Jaıaý júrginshilerdi qaǵyp ketkennen keıin ol turaqta turǵan Honda CR-V kóligin baryp soqqan. Jol apatynan kólik júrgizýshisi zardap shekken joq.
