Sýarý sýyn jetkizýshi monopolııalarǵa 17,8 mln teńge aıyppul salyndy
ASTANA. KAZINFORM — Tutynýshylardyń quqyǵyn buzǵan sýarý sýyn jetkizýshilerge 17,8 mln teńge aıyppul salyndy. Bul týraly Sý resýrstary jáne ırrıgatsııa mınıstrligi málim etti.
Vedomstvonyń málimetinshe, mınıstrlik tutynýshylardyń quqyǵyn qorǵaý maqsatynda sýarý sýyn berý qyzmetin kórsetetin tabıǵı monopolııa sýbektilerine qatysty birqatar shara qabyldady. Atap aıtqanda, bekitilgen tarıftik smetany jáne ınvestıtsııalyq baǵdarlamany oryndamaý, sondaı-aq bekitilgen tarıftik smetanyń oryndalýy týraly esepterdi usynbaý faktileri anyqtaldy. Nátıjesinde 21 tabıǵı monopolııa sýbektisine jalpy somasy 17,8 mln teńge aıyppul salyndy.
Qazirgi tańda osy somanyń 14,8 mln teńgesi óndirip alyndy. Qalǵan aıyppuldar boıynsha materıaldar májbúrlep óndirip alý úshin sot oryndaýshylaryna joldandy. Sonymen qatar 11 sýbektige qatysty tarıftik smetalardyń oryndalýy jónindegi esepterdi jáne zańnama talaptaryna sáıkes tarıfterdi bekitýge ótinimderdi usynýǵa mindetteý týraly 12 talap-aryz berildi. Onyń ishinde 6 is boıynsha sot mınıstrliktiń paıdasyna sheshim shyǵardy, qalǵan 6 talap-aryz qaralyp jatyr.
– Mınıstrlik tabıǵı monopolııa sýbektileriniń barlyq normatıvtik talapty oryndaýyn qamtamasyz etý boıynsha júıeli jumysty jalǵastyrady. Bul saladaǵy zańnamanyń negizgi maqsaty men qaǵıdaty – tutynýshylar men tabıǵı monopolııa sýbektileriniń múddelerin qorǵaý jáne olardyń arasyndaǵy tepe-teńdikti saqtaý, – dedi Sý resýrstary jáne ırrıgatsııa mınıstrligi Tarıftik saıasatty retteý departamentiniń dırektory Darhan Qaınberdıev.
Aıta keteıik, elimizdegi sý qoryn qorǵaý salasyndaǵy qolda bar úzdik tehnologııalar tizimi jasaldy.