Sýarý maýsymyna daıyndyq: 526 shaqyrym kanal tazartyldy
ASTANA.KAZINFORM — Jyl basynan beri sýarý maýsymyna daıyndyq maqsatynda «Qazsýshar» RMK 526 shaqyrymnan astam ırrıgatsııalyq kanalda mehanıkalyq tazalaý jumystary júrgizildi. Sý resýrstary jáne ırrıgatsııa mınıstri Nurjan Nurjigitov vegetatsııa kezeńine daıyndyq máseleleri boıynsha apparat keńesin ótkizdi. Bul týraly vedomstvonyń baspasóz qyzmeti málim etti.
Búginge deıin tazartylǵan kanaldardyń 355 shaqyrymy Túrkistan oblysynda, 40,5 shaqyrymy Qyzylorda oblysynda, 41,9 shaqyrymy Jetisý oblysynda, 68,7 shaqyrymy Jambyl oblysynda, 20,4 shaqyrymy Almaty oblysyndaǵy D. Qonaev atyndaǵy Úlken Almaty kanaly fılıalynyń qaraýynda. Jalpy, bıyl «Qazsýshar» RMK-nyń on fılıalynyń qaramaǵyndaǵy 2211,8 shaqyrym kanaldy mehanıkalyq ádispen tazartý josparlanyp otyr.
Olardyń qatarynda Shyǵys Qazaqstan, Pavlodar, Abaı jáne Ulytaý oblystaryndaǵy fılıaldar, sondaı-aq Q. Sátbaev atyndaǵy kanal fılıaly bar. Aıta keteıik, sońǵy 2,5 jylda «Qazsýshar» RMK kúshimen 3,5 myń shaqyrymnan astam ırrıgatsııalyq kanal tazartyldy.
– Bul sharalardy júzege asyrý kanaldardyń sý ótkizý qýatyn arttyrýǵa jáne sýarmaly jerlerge sý jetkizýdi jaqsartýǵa múmkindik beredi. Jumystarǵa Sý resýrstary jáne ırrıgatsııa mınıstrligi usynǵan arnaıy tehnıka jumyldyryldy. Atap aıtqanda, 12 shynjyrtabandy ekskavator, 39 dońǵalaqty ekskavator, 31 býldozer jáne 79 tıegish paıdalanylyp jatyr. «Qazsýshar» RMK tehnıka parkin jańartý kanaldardy mehanıkalyq ádispen tazartý jumystaryn edáýir jedeldetýge múmkindik berdi, – dedi «Qazsýshar» RMK bas dırektorynyń mindetin atqarýshy Anýar Óskenbaev.
Eske sala keteıik, buǵan deıin únemdelgen qarjy esebinen 14 kanal betondalyp jatqanyn jazdyq.
