Sýarý maýsymyna arnalǵan sý lımıti bekitildi
ASTANA. KAZINFORM – Qazaqstannyń ońtústik óńirlerindegi sý qoımalarynda qazir 26,2 mlrd tekshe metr sý jınalǵan. Bul ótken jyldyń osy kezeńimen salystyrǵanda shamamen 1 mlrd tekshe metrge kóp.
Bul týraly Sý resýrstaryn retteý, qorǵaý jáne paıdalaný komıtetiniń tóraǵasy Seıilbek Nurymbetov OKQ alańynda ótken baspasóz máslıhatynda málimdedi.
Onyń aıtýynsha, bıyl el boıynsha 1,2 mln gektar sýarmaly jerdi sýmen qamtamasyz etý úshin shamamen 11 tekshe shaqyrym sý paıdalaný josparlanǵan.
– Sý resýrstaryn óńirler arasynda tıimdi ári ádil bólý úshin bıylǵy sý lımıtteri bekitildi. Almaty oblysyna 2,1 mlrd tekshe metr, Jetisý oblysyna 1,8 mlrd tekshe metr sý bólindi, – dedi ol.
Komıtet tóraǵasynyń málimetinshe, Balqash-Alakól basseınindegi sý qoımalarynyń tolymdylyǵy 97 paıyzǵa jetken. Al Qapshaǵaı sý qoımasy 98 paıyzǵa deıin tolǵan.
Sonymen qatar birqatar óńirde sý tapshylyǵy qaýpi saqtalyp otyr. Ásirese Almaty oblysyndaǵy Kúrti sý qoımasyndaǵy jaǵdaı alańdaýshylyq týǵyzady.
– Qazir Kúrti sý qoımasynda 59,5 mln tekshe metr sý bar. Bul ótken jylǵy kórsetkishten 41,9 mln tekshe metrge az, – dedi Seıilbek Nurymbetov.
Onyń sózinshe, Shý-Talas basseınindegi sý qoımalary 71 paıyzǵa tolǵan. Qyrǵyzstan aýmaǵyndaǵy Kırov jáne Orto-Tokoı sý qoımalaryndaǵy sý deńgeıiniń tómen bolýy da alańdaýshylyq týǵyzyp otyr. Qazir bul sý qoımalary orta eseppen 77 paıyzǵa ǵana tolǵan.
Osy jaǵdaıǵa baılanysty Shý-Talas basseıni boıynsha sý lımıti 1,2 mlrd tekshe metrden 900 mln tekshe metrge deıin qysqartyldy.
Sý tapshylyǵynyń aldyn alý maqsatynda Shý-Talas sý sharýashylyǵy komıssııasynyń sáýirdegi otyrysynda sý berý kesteleri bekitilgen. Soǵan sáıkes, Shý ózeni arqyly 170 mln tekshe metr, al Talas ózeni arqyly 340 mln tekshe metr sý jiberý josparlanyp otyr.
Aral-Syrdarııa basseınindegi iri sý qoımalarynyń tolymdylyǵy qazir 73 paıyzdy quraıdy. Bul ótken jylǵy deńgeıden 12 paıyzǵa joǵary. Al Shardara sý qoımasy 99 paıyzǵa deıin tolǵan.
Qazirgi gıdrologııalyq jaǵdaı eskerilip, Qyzylorda oblysyna 3,2 mlrd tekshe metr, Túrkistan oblysyna 3,8 mlrd tekshe metr sý lımıti bekitildi.
Aıta keteıik, buǵan deıin sý únemdeý máselesiniń ózektiligi jáne ony sheshý joldary týraly jazǵan edik.
