Sýarý maýsymy bastalǵaly aýyl sharýashylyǵynyń qajettiligine 8 mlrd tekshe metrden astam sý jiberildi

ASTANA. KAZINFORM — Bıylǵy sýarý kezeńi bastalǵaly beri Qazaqstanda aýyl sharýashylyǵynyń qajettiligine 8 mlrd tekshe metrden astam sý paıdalanylǵan. Bul týraly Sý resýrstary jáne ırrıgatsııa mınıstrligi málim etti.

Vedomstvonyń málimetinshe, bul kólemniń shamamen 7,7 mlrd tekshe metri eldiń ońtústigindegi bes óńirge tıesili. Qyzylorda oblysynda «Qazsýshardyń» jergilikti fılıaly dıqandarmen sý berý boıynsha 1 015 kelisimshart jasasqan. Búginde oblysta 126,6 myń gektar jer sýarylyp, jalpy sý jiberý kólemi 2,766 mlrd tekshe metrdi qurap otyr. 

Oblysta bes magıstraldyq jáne úsh sharýashylyqaralyq kanaldar arqyly kezekpen sý beriledi. Qazirgi ýaqytta óńirdiń barlyq egistiginiń 98%-y kezekpen sýarylady.

Qyzylorda oblysynyń egis alqaptaryna sý berýdi jaqsartý úshin Sý resýrstary jáne ırrıgatsııa mınıstrligi men Tótenshe jaǵdaılar mınıstrligi ırrıgatsııalyq kanaldarda jyljymaly sorǵy qondyrǵylaryn ornatý jumystaryn júrgizdi. Barlyǵy 324 qondyrǵy ornatyldy. Túrkistan oblysynda sý paıdalaný kólemi — 3,01 mlrd tekshe metr, al sýarylǵan alqaptardyń aýdany — 367,9 myń ga.

 «Qazsýshardyń» jergilikti fılıaly sharýalarmen sý berý boıynsha 9 608 shart jasasqan. Oblystyń Saýran aýdanynda 72 tik drenajdy uńǵyma paıdalanýǵa berildi. Bul egis alqaptaryn qosymsha sý kólemimen qamtamasyz etý úshin qajet. Ordabasy aýdanynda 17 tik drenajdy uńǵyma jóndeldi. Sondaı-aq óńirde «Dostyq» memleketaralyq kanalynyń tómengi aǵysyndaǵy sharýa qojalyqtaryn sýmen qamtýdy jaqsartý jáne «Qazsýshardyń» Túrkistan fılıalynyń kanaldaryndaǵy sý deńgeıin kóterý úshin «Mashınalyq ádispen sý kóterý kanalyn» mehanıkalyq tazartýdy aıaqtady.

Jetisý oblysynda búginde sý berýge 7 492 shart jasaldy. Óńirdegi jalpy sý alý kólemi shamamen 673 mln tekshe metr, vegetatsııa kezeńi bastalǵaly beri 103,8 myń ga jer sýaryldy. Sonymen qatar 17 myń gektarǵa ylǵaldandyrý jumysy júrgizildi. Jambyl oblysynda sý alý kólemi — 588,6 mln tekshe metr, sýarylǵan egistik kólemi — 66,6 myń gektar. Óńirde sý berý boıynsha 3 872 kelisimshart jasalǵan.

Vegetatsııa kezeńine daıyndyq aıasynda «Qazsýshardyń» jergilikti fılıaly 28,8 km kanalǵa mehanıkalyq tazalaý júrgizdi. Almaty oblysynda naqty sý alý 631,4 mln tekshe metr. Vegetatsııa kezeńi bastalǵannan beri óńirde 128,4 myń ga jer sýaryldy. Onyń ishinde «D. Qonaev atyndaǵy Úlken Almaty kanaly» arqyly 46 myń gektardan astam alqapqa 226,84 mln tekshe metr sý berilgen. Kásiporyn sý berý boıynsha 2 740 kelisimshart jasasqan. Egis alqaptaryna sýdy tıimdirek jetkizý úshin Qazaqstannyń barlyq oblysyndaǵy «Qazsýshar» fılıaldary 780 km ırrıgatsııalyq kanalǵa mehanıkalyq tazartý júrgizdi. Sondaı-aq 78 gıdrotehnıkalyq nysan jóndeldi.

— Bıyl joǵary temperatýra men jaýyn-shashynnyń bolmaýyna baılanysty Qazaqstannyń ońtústik óńirlerinde sýarý kezeńi 20 kúnge erte bastaldy. Sol sebepti vegetatsııa basynda sý tutyný orta eseppen 50%-ǵa artty, bul sý resýrstaryna qosymsha júkteme túsirdi. Sýdy utymdy paıdalaný jáne tapshylyqqa jol bermeý maqsatynda sý kezekpen berilip jatyr. Sonymen qatar sý tek „Qazsýshar“ RMK-men tıisti kelisimshart bolǵan jaǵdaıda ǵana beriledi. Vegetatsııa kezeńiniń ótý barysy mınıstrliktiń turaqty baqylaýynda,— dedi Sý resýrstary jáne ırrıgatsııa birinshi vıtse-mınıstri Nurlan Aldamjarov.

Eske sala keteıik, buǵan deıin elimizde jyl basynan beri 780 shaqyrym kanal tazartylǵanyn jazǵan edik.