Sýarý maýsymy aıaqtaldy: El boıynsha 11,01 mlrd m³ sý paıdalanyldy
ASTANA. KAZINFORM — Sý resýrstary jáne ırrıgatsııa mınıstri Nurjan Nurjigitov vegetatsııa kezeńiniń qorytyndysy boıynsha apparat keńesin ótkizdi, dep habarlaıdy vedomstvonyń baspasóz qyzmeti.
2025 jylǵy sýarý maýsymynda el boıynsha jalpy 11,01 mlrd tekshe metr sý alyndy, onyń 98%-y ońtústik óńirlerge tıesili. Almaty oblysynda 136 myń gektar jer sýarylyp, sharýalardyń qajetine 1,6 mlrd tekshe metr sý alyndy. Jetisý oblysynda 140 myń gektar egistik alqaptary sýarylyp, sý alý kólemi 1,2 mlrd tekshe metr boldy. Jambyl oblysynda shamamen 79 myń gektar jer sýaryldy, al sharýalarǵa Tasótkel sý qoımasynan, Shý jáne Talas ózenderinen barlyǵy 1 mlrd tekshe metr shamasynda sý alyndy. Qyzylorda oblysynda vegetatsııa kezeńi qorytyndysy boıynsha 3,5 mlrd tekshe metr sý paıdalanylyp, 125 myń gektar egistik jer sýaryldy. Túrkistan oblysynda shamamen 400 myń gektar jerge sý berilip, jalpy kólemi 3,4 mlrd tekshe metr sý alyndy.
— Ońtústik óńirlerde bıylǵy vegetatsııa kezeńi kúrdeli klımattyq jaǵdaıda ótti. Soǵan qaramastan, mınıstrlik, jergilikti atqarýshy organdar jáne sharýalardyń úılesimdi jumysynyń nátıjesinde sýarý maýsymy turaqty ótti. Biz ońtústik óńirlerde sýdyń ádil bólinýin qamtamasyz etý úshin tórt jumys tobyn qurdyq. Sonymen qatar kanaldar arqyly sýdy kezekpen berý kesteleri bekitildi, sorǵy qondyrǵylary men tik drenaj júıeleri iske qosyldy, sý sharýashylyǵyndaǵy jaǵdaı turaqty baqylaýda boldy. Kollektorlyq-drenajdyq sý da qaıta paıdalanyldy, — dedi Sý resýrstary jáne ırrıgatsııa mınıstri Nurjan Nurjigitov.
Budan buryn Sý resýrstary jáne ırrıgatsııa mınıstrligi janynan úkimettik emes uıymdarmen ózara is-qımyl jónindegi úılestirý keńesi qurylatynyn jazǵan edik.