Sýarý kezeńinde qosymsha 68 mln tekshe metr sý bolady — mınıstr
ASTANA. KAZINFORM — Jyl sońyna deıin 153 aýyl sapaly aýyz sýmen qamtylady. Bul týraly Sý resýrstary jáne ırrıgatsııa mınıstri Nurjan Nurjigitov aıtyp berdi.
— Jyl sońyna deıin toptyq sý qubyrynyń 12 jobasyn aıaqtaý josparlanýda, bul 423 myń halqy bar 153 aýyldy sapaly aýyz sýmen qamtamasyz etýge múmkindik beredi. Bul rette 52 eldi meken ortalyqtandyrylǵan sýmen jabdyqtaý júıesine qosylady, — dedi mınıstr búgingi Úkimet otyrysynda.
Sondaı-aq, Yntymaq (Jambyl oblysy), Kırov (BQO), Qapshaǵaı (Túrkistan oblysy) 3 sý qoımasyn qaıta jańartý jáne Túrkistan oblysyndaǵy «Báıdibek ata» sý qoımasynyń qurylysy jalǵasady.
Osylaısha, sýarý kezeńinde qosymsha 68 mln tekshe metr sý bolady, bul Túrkistan oblysynyń 6 aýdanyn sýmen qamtýdy arttyrýǵa kepildik beredi.
Sonymen birge, bıyl aspaly alańy bar 1953 km sýarý kanaldary paıdalanýǵa beriledi.
— Barlyq bastamany iske asyrý 2030 jylǵa qaraı 10 mlrd tekshe metr sýdy únemdeýge jáne jınaqtaýǵa múmkindik beredi. Uzaqmerzimdi perspektıvada bul eldiń sý qaýipsizdigin qamtamasyz etedi, aýyl sharýashylyǵynyń ónimdiligin arttyrady jáne ekologııalyq turaqtylyqty qamtamasyz etedi, — deıdi N. Nurjigitov.
Buǵan deıin Ortalyq Azııada transshekaralyq ózender máselesi qalaı sheshilip jatqany týraly materıal jarııalanǵan edi.