Sýarý kezeńi aıaqtalǵansha Qazaqstan Syrdarııa arqyly taǵy 1,5 mlrd tekshe metr sý alady - mınıstr
TAShKENT. KAZINFORM – 2024 jyldyń 1 qazanynan beri Syrdarııa ózeni arqyly Shardara sý qoımasyna 14,2 mlrd tekshe metr sý tústi. Muny Tashkentke jumys saparymen kelip, Kazinform tilshisiniń saýalyna jaýap bergen QR Sý resýrstary jáne ırrıgatsııa mınıstri Nurjan Nurjigitov aıtty.
- Vegetatsııa jáne vegetatsııaaralyq kezeńder bar ekenin eskerýimiz kerek. Soǵan saı, 1 qazannan bastap búgingi kúnge deıin Syrdarııa ózeni boıynsha Shardara sý qoımasyna 14 mlrd 200 mln tekshe metr sý keldi. Sýarý maýsymynyń aıaqtalýyna shamamen úsh aı qaldy. Bizdiń kelisimge sáıkes, osy aralyqta qosymsha 1,5 mlrd tekshe metr sý alamyz dep josparlap otyrmyz, - dep jaýap berdi Nurjan Nurjigitov Kazinform tilshisiniń saýalyna.
Mınıstrdiń aıtýynsha, 2023 jyldyń 1 qazanynan 2024 jyldyń 1 qazanyna deıin ózbek tarapy Syrdarııa ózeni arqyly Shardaraǵa 14,8 mlrd tekshe metr sý baǵyttaǵan.
Eske salaıyq, mınıstrlik bıyl Syrdarııa ózeni arqyly Shardara sý qoımasyna 16 mlrd tekshe metr sý túsetinin málimdep edi.
Buǵan qosa, Qazaqstan men Ózbekstan Syrdarııa ózeniniń boıyna sý esepteıtin qurylǵylar ornatýǵa nıetti ekenin jazyp edik. Mınıstr Nurjan Nurjigitov atap ótkendeı, bul jumys bıyl aıaqtalýy tıis.
Sonymen qatar jyl basynda vedomstvo basshysy: «Sý máselesine qatysty jaǵdaı byltyrǵydan jaman bolmaıdy», dep sendirip edi.