Sý arnalaryn tsıfrlandyrý sýarmaly sýdyń baǵasyn qymbattatpaıdy — vıtse-mınıstr
ASTANA. KAZINFORM — Elimizdegi sý arnalary tsıfrlandyrylady. Alaıda bul sýarmaly sý tarıfterine áser etpeıdi. Bul jóninde QR Sý resýrstary jáne ırrıgatsııa vıtse-mınıstri Erbolat Ibraıhanov málimdedi.
— Islam damý bankinen alynǵan nesıeniń alǵashqy bóligine Qazaqstandaǵy 103 sý arnasy tsıfrlandyrylady. Nesıe bıýdjet esebinen qaıtarylady. Tarıfti ósirip, qaryz qaıtarý múlde josparda joq, — dedi vıtse-mınıstr.
Sondaı-aq ol sý arnalarynyń gıdrotehnıkalyq qurylǵylaryn tsıfrlandyrýǵa sýarmaly sý tarıfteri esebinen 600 mıllıon teńge qarastyrylǵanyn atap ótti.
Degenmen, bul sýarmaly sý baǵasyn ósirmeıdi. Óıtkeni, tarıfter 2024 jyly bekitilip, sol baǵa 2028 jylǵa deıin ózgermeıdi.
Aıta keteıik, buǵan deıin Qazaqstanda 42 jańa sý qoımasy salynatynyn jazǵanbyz.
Sonymen qatar, Túrkistan oblysynda jańa eki sý qoımasynyń qurylysy aıaqtalýǵa jaqyn ekenin habarlaǵanbyz.
Al bes sý qoımasynda keń aýqymdy batımetrııalyq túsirilim jasalǵany jóninde jazǵan edik.