Sýarmaly jerler alańyn arttyrý qandaı nátıje beredi
NUR-SULTAN. QazAqparat – 2030 jylǵa qaraı sýarmaly jerler alańyn 2 ese artady. Bul týraly búgin Úkimet otyrysynda QR Aýyl sharýashylyǵy mınıstri Erbol Qarashókeev aıtty, dep habarlaıdy QazAqparat tilshisi.
«Memleket basshysynyń tapsyrmalaryn oryndaý aıasynda sýarmaly alańdardy 2025 jylǵa qaraı 2,2 mln gektarǵa jáne 2030 jylǵa qaraı 3 mln gektarǵa jetkizý jumystary jalǵasýda. Sýdy kóp qajet etetin kúrish jáne maqta, sondaı-aq masaqty dándi daqyldar sııaqty daqyldardyń úlesiniń azaıýy kútilýde, bul rette dándi masaqty daqyldardy sýarý tek azyqtyq aýyspaly egiste ǵana kózdelgen. Jalpy kórsetilgen sharalar 2030 jylǵa qaraı sýarmaly jerler alańyn 2 ese, jalpy jınalymdy 5,6 ese, jalpy paıdany 6,4 ese ulǵaıtýǵa múmkindik beredi», - dedi E. Qarashókeev.
Onyń aıtýynsha, sýarmaly eginshiliktiń tıimdiligin arttyrý perspektıvalary sýarýdyń sý únemdeý tehnologııalaryn keńinen qoldanýmen tyǵyz baılanysty, bul sý shyǵynyn azaıtýǵa jáne sý men qorektik zattardy núkteli berý arqyly ónimdilikti arttyrýǵa múmkindik beredi.
«Búgingi kúni sý únemdeý tehnologııalary engizilgen alańdardyń ulǵaıǵany baıqalady, oǵan ınvestıtsııalyq sýbsıdııalaý yqpal etti. Bul ınvestıtsııalyq sýbsıdııalaý aıasynda fermerlerdiń qazirgi zamanǵy sýarý júıelerin satyp alýǵa, sondaı-aq sý alý men berýge arnalǵan búkil qajetti ınfraqurylymdy júrgizýge jumsaǵan shyǵyndarynyń 50%-y óteledi», - dedi mınıstr.
Budan buryn habarlanǵandaı, 2021 jyly sý sharýashylyǵy ınfraqurylymy júrgizilgen alań 1,6 mln gektardy qurady.
