Sýarmaly jer - Qazaqstan aýyl sharýashylyǵynyń altyn qory
Mınıstrdiń aıtýynsha, Qazaqstanda qazirgi jaǵdaıda sýarýdyń zamanaýı ádisterin paıdalaný jáne agrotehnologııalardy saqtaý arqyly joǵary ónim alýǵa bolady. Máselen, keıbir sharýashylyqtarda súrlemdik júgeriniń ónimdiligi gektaryna tórt júz tsentnerge deıin óndirilgen. Al elimiz boıynsha júgeri ónimdiliginiń ortasha deńgeıi gektaryna 113 tsentnerden kelgen edi.
«Sýarmaly jer - Qazaqstan aýyl sharýashylyǵynyń altyn qory. Sondyqtan da, búgingi kúni saladaǵy asa ózekti máseleniń biri sýarmaly jerlerdiń melıoratıvtik júıesin saýyqtyrý bolyp tabylady», - deıdi mınıstr.
Onyń aıtýynsha, Qazaqstandaǵy sý resýrstarynyń aýqymy 100 tekshe/ shaqyrymnan astam sýdy quraıdy. Sonyń ishinde 56 paıyzǵa jýyǵy nemese 56,6 tekshe/shaqyrym Qazaqstan aýmaǵynyń óz ishinde qalyptasatyn bolsa, qalǵan 44 paıyzy el aýmaǵynan tys jerlerden keledi. «Bul rette sýdyń barlyq aýqymynyń paıdalanýǵa qalatyny 42 paıyzdy nemese 42,6 tekshe/shaqyrymdy quraıdy. Osyǵan oraı, jyl saıyn eldegi sýdyń jaǵdaıyna, sý nysandarynyń sanıtarlyq jaǵdaıyna qaraı ony tutyný lımıti belgilenip keledi. Máselen, ekonomıka salalaryndaǵy sýdy paıdalaný boıynsha lımıt 2012 jyly 26,7 tekshe/shaqyrymdy qurady. Bunyń 18,4 tekshe/shaqyrymy naqty is júzinde paıdalanyldy. Al sýdy paıdalanýdyń basym bóligi, nemese atalǵan kórsetkishtiń 60 paıyzy aýyl sharýashylyǵy salasynda tutynylady», deıdi A. Mamytbekov.