Sýarmaly jerlerge sý berý jaqsarady: 1800 shaqyrym kanal tazartyldy
ASTANA. KAZINFORM — Jyl basynan beri Sý resýrstary jáne ırrıgatsııa mınıstrliginiń «Qazsýshar» RMK fılıaldary 1800 shaqyrym kanaldy mehanıkalyq tásilmen tazalady.
Jyl sońyna deıin taǵy 411 shaqyrym kanaldy tazalaý josparlanyp otyr. Osylaısha, Qazaqstanda kanaldardy mehanıkalyq tásilmen tazalaý qarqyny artyp keledi.
Salystyrmaly túrde aıtsaq, 2025 jyly «Qazsýshar» RMK fılıaldary 1840 shaqyrym kanaldy tazalasa, 2024 jyly 1147,6 shaqyrym, al 2023 jyly 678 shaqyrym kanal tazartyldy.
Sonymen qatar sýarý jelilerin aýqymdy rekonstrýktsııalaý jumystary júrgizilip jatyr. Qazirgi ýaqytta jalpy uzyndyǵy 4,6 myń shaqyrym bolatyn kanaldarda jumys atqarylyp jatyr. Jyl sońyna deıin 962 shaqyrym kanaldy paıdalanýǵa berý josparlanǵan. Bul shamamen 200 myń gektar sýarmaly jerdiń sýmen qamtamasyz etilýin jaqsartýǵa múmkindik beredi.
— Kanaldardy mehanıkalyq tásilmen tazalaý sýarmaly jerlerge sý berý sapasyn jaqsartyp, sý ysyrabynyń kólemin azaıtýǵa múmkindik beredi. Bul vegetatsııa kezeńiniń turaqty ótýine yqpal etedi. Tazalaý jumystary qarqynynyń artýy «Qazsýshar» RMK arnaıy tehnıka parkin jańartýmen baılanysty. Byltyr kásiporynǵa 576 jańa tehnıka bólindi. Budan bólek, tarıf qarajaty esebinen taǵy 135 tehnıka satyp alyndy, — dedi Sý resýrstary jáne ırrıgatsııa vıtse-mınıstri Jandos Sálimov.
Buǵan deıin sýarmaly jerler úshin Ertis basseıninen 160 mln tekshe metr sý bólingenin jazǵanbyz.
