Sýarmaly jerler úshin Ertis basseıninen 160 mln tekshe metr sý bólingen
PAVLODAR. KAZINFORM — Ertis ózenin paıdalanyp, sýarmaly eginshilikpen aınalysyp otyrǵan fermerler qazirdiń ózinde 81,1 mln tekshe metr sý alyp úlgergen.
Sýarmaly eginshilikti qoldaý maqsatynda Ertis ózeni basseıninde 160 mln tekshe metr sý qarastyrylǵan. Mamandardyń aıtýynsha, málimdelgen kólem jergilikti aýyl sharýashylyǵy taýar óndirýshileriniń qajettilikterin tolyqtaı óteıdi.
Sý paıdalanýshylardyń aldyn ala málimetteri boıynsha, óńirdegi josparly sýarý alańy — 86,6 myń gektar. Al josparlanǵan sý alý kólemi — 152 mln tekshe metr. Búgingi tańda agrarshylar 70 myń gektardan astam jerdi sýarý úshin 81,1 mln tekshe metr sý alyp úlgergen.
— Qazirgi ýaqytta Ertis basseıniniń iri sý qoımalarynda 39,8 mlrd tekshe metr sý jınaldy. Bul olardyń jobalyq kóleminiń 75,7%-yn quraıdy. Shúlbi sý qoımasynyń kólemi 2,2 mlrd tekshe metrdi qurap otyr. Boljam boıynsha, tamyz aıyndaǵy búıirlik aǵyndar sekýndyna 36-60 tekshe metrdi quraıdy. Qolda bar sý qorynyń kólemi aǵymdaǵy sýarý maýsymynyń qajettilikterin qamtamasyz etýge tolyq jetkilikti, — deıdi Sý resýrstaryn retteý, qorǵaý jáne paıdalaný komıteti Ertis basseındik sý ınspektsııasy basshysynyń orynbasary Eleýsiz Qambarov.
Búginde ınspektsııa aǵyn boljamdary men agrarshylardyń suranystaryn eskere otyryp, sý qoımalarynyń jumys rejımin únemi rettep otyrady. Mundaı ıkemdi tásil kez kelgen ózgeristerge jedel áreket etýge jáne atyzdarǵa sýdyń turaqty jetýine kepildik berýge jaǵdaı týdyrady. Sonymen qatar mamandar sýy az sýly tsıkldiń bastalýyn eskere otyryp, óńirdiń aýyl sharýashylyǵy taýar óndirýshilerine qazirden bastap sý únemdeý tehnologııalaryn belsendi túrde engizý qajettigin basa aıtady.
Eske sala keteıik, bıyl Ertis jaıylmalarynyń 80 paıyzdan astamyn ǵana sý basady dep boljanǵan bolatyn.
