Sýarmaly eginshilik kezinde jyl saıyn 2 tekshe shaqyrym sý shyǵyn bolady
ASTANA. KAZINFORM – Sýarmaly eginshilik kezinde jyl saıyn 2 tekshe shaqyrym sý shyǵyn bolady. Bul týraly búgin Májilistiń komıtet otyrysynda Sý resýrstary jáne ırrıgatsııa vıtse-mınıstri Erbolat Ibraıhanov aıtty.
«Elimizde 17 myńnan astam ózen men ýaqytsha sý aǵyndary, 4 myń kól, 4,5 myń jer asty sý ken oryndary, 13 myńnan astam sý sharýashylyǵy nysany bar. Sý sharýashylyǵy nysandary jalpy sanynyń 6 501-i – respýblıkalyq menshikte, 6 296-si - kommýnaldyq menshikte, 528-i - jeke menshikte jáne 31-i - ıesiz. Jalpy alǵanda elimizdegi jyl saıyn paıdalynylatyn sý resýrstarynyń 65 paıyzyna jýyǵy aýyl sharýashylyǵy qajettilikterin qanaǵattandyrý maqsatynda qoldanylady. Aýyl sharýashylyǵyndaǵy ınfraqurylymdardyń tozyǵy jetkendikten olardy damytý ózekti másele bolyp otyr. Jyl saıyn osy ınfroqurylymdardyń tozyǵy jetýinen sýarmaly eginshiliktiń ózinde shamamen 2 tekshe shaqyrymnan asa sý jetkizý kezinde shyǵyn bolady», - dedi vıtse-mınıstr.
Onyń atap ótýinshe, atalǵan shyǵyndardyń kólemin azaıtý maqsatynda mınıstrlik tarapynan Qazaqstan Respýblıkasynyń sý resýrstaryn basqarý júıesin damytýdyń 2024-2030 jyldarǵa arnalǵan tujyrymdamasyn iske asyrý jónindegi is-qımyl jospary aıasynda nysandardy rekonstrýktsııalaý jáne arnalardyń paıdaly áser koeffıtsentin ulǵaıtý maqsatynda jumys istelip jatyr.
«Sonymen qatar elimizdegi ınfraqurylymdardyń jetilmeýi sebebinen de ústimizdegi jyly bolǵan sý tasqyny kezeńi qıyn jaǵdaıda ótkeni ózderińizge málim. Sondyqtan mınıstrlik tarapynan jańa sý sharýashylyǵy nysandaryn qarqyndy salý men barlaryn jóndeýge basymdyq beriledi. Sý tasqyny kezeńinde kóp sýdyń kelýine baılanysty Aqtóbe, SQO, Qostanaı, Amola, BQO, Atyraý óńirlerinde asa shıelenisti boldy. Oǵan qosa kórshi Reseı jáne Qytaı elderindegi iri sý bógetteriniń jarylýy elimizge transshekaralyq ózender arqyly keletin sý resýrstaryn barynsha qaýipsiz ótkizý maqsaty týyndady», - dedi Erbolat Ibraıhanov.
