Sýarestiń «inisi» de ońdyrmaı tistep aldy
ASTANA. QazAqparat - Parıjdiń «PSJ» gandbol klýbynda óner kórsetetin horvat legıoneri Marko Koplıar «Shamberı» komandasymen ótip jatqan oıynda qarsylasynyń qolyn tistep aldy.
Boıy 2 metr 11 santımetr, salmaǵy 108 keli keletin Marko Koplıar qarsylas komandanyń oıynshysy Benjamın Jıdi tistep jaraqattaǵan. Tóreshi bul sátti nazardan tys qaldyrmaı, «PSJ» klýbynyń oıynshysyna kezdesýdi jalǵastyrýǵa ruqsat bermegen. Nátıjesinde parıjdik klýb 32:33 esebimen qarsylastaryna ese jiberipti. Al, endi horvat sportshysyn jeńil jaza kútip turmaǵany anyq.
Kóptegen basylymdar Marko Koplıar áreketin Lýıs Sýares tártipsizdigimen salystyra jazýda. Aıta keteıik, Brazılııada ótken álem chempıonatynda ýrýgvaılyq shabýylshy Italııa quramasynyń oıynshysy Djordjıo Kelınıdi tistep alǵan bolatyn. Keıinnen FIFA fýtbolshyny 4 aı kóleminde alańǵa shyǵýyna shekteý qoıyp, ulttyq qurama sapynda 9 oıynǵa qatyspaýǵa jaza kesken-di. Fýtbolshy 25 qazan kúni "el-klasıko" kezdesýine shyǵady dep kútilýde.
