Sý únemdeýge yntalandyratyn tarıfter qajet – Ekologııa mınıstrligi

NUR-SULTAN. QazAqparat – Sý qaýipsizdigi máseleleri ulttyq qaýipsizdik máselelerimen qatar tur. Bul týraly QR Ekologııa, geologııa jáne tabıǵı resýrstar mınıstrligi Sý resýrstary komıteti tóraǵasynyń orynbasary Dosbol Bekmaǵambetov aıtyp berdi, dep habarlaıdy QazAqparat tilshisi.

«Sý salasyndaǵy qazirgi problemalar ásirese halyq tyǵyz ornalasqan ońtústik óńirlerde qalyptasyp otyrǵanyn eskersek, sý qaýipsizdigi máseleleri ulttyq qaýipsizdik máselelerimen qatar tur», - dedi Dosbol Bekmaǵambetov Ortalyq kommýnıkatsııalar qyzmetinde ótken baspasóz máslıhatynda.

Osyǵan baılanysty, spıker transshekaralyq sý aǵyndaryn basqarý jáne paıdalaný kezinde Qazaqstannyń múddesin qorǵaýdy kúsheıtý keregin aıtty.

Transshekaralyq yntymaqtastyq jónindegi jumystardy vedomstvoaralyq úılestirý úshin Qazaqstannyń sý keńesi quryldy. Yntymaqtastyq máselelerin talqylaý úshin barlyq halyqaralyq alańdar iske qosylady.

«Ekinshiden, sýdy paıdalaný tıimdiligin arttyryp, sýǵa suranysty basqarý qajet. Ol úshin sýdy bólý jáne esepke alý protsesterin tsıfrlandyrý jáne avtomattandyrý jumystaryn jandandyrý, sý tutyný lımıtteri men normalaryn tómendetý arqyly sýdyń naqty suranysyn normatıvtik suranysqa jaqyndatý qajet. Budan basqa, sý únemdeýge yntalandyratyn tarıfter belgileý qajet. Bul rette, memleket bóletin sýbsıdııalar mólsheri sýarý normalarymen jáne sý únemdeý tehnologııalaryn engizý deńgeıimen baılanystyrylýy tıis», - dedi D. Bekmaǵambetov.

Foto: ortcom.kz