Sý únemdeýge baǵyttalǵan joba: Jambylda 71 kanal jańartylady

Jambyl aýdanynda mınıstr uzyndyǵy 9,2 shaqyrym bolatyn «Ismaıl» kanalyndaǵy qurylys-montaj jumystaryn kórdi. Eýropalyq qaıta qurý jáne damý bankiniń qoldaýymen júrgizilip jatqan jumystar bıyl qańtar aıynda bastalǵan. Qazirgi tańda kanaldyń 3,2 shaqyrym bóligi rekonstrýktsııalandy.

Vedomstvonyń málimetinshe, joba aıasynda kanaldy betondaý, sý shyǵarý qurylǵylaryn, bóget qurylystaryn jáne nóser sý aǵyzý júıelerin ornatý, sondaı-aq gıdrobeket salý kózdelgen. «Ismaıl» kanaly arqyly Asa ózeninen Jambyl aýdanynyń sýarmaly alqaptaryna sý jetkiziledi. Kanaldyń ótkizý qýaty — sekýndyna 6 tekshe metr. Rekonstrýktsııa nátıjesinde 1454 gektar jerge sý jetkizý jaqsaryp, shyǵyn azaıady. Odan keıin Nurjan Nurjigitov bıyl bastalǵan «Saza», «Tómengi Saza», «Aıtaq», «Boshaqaı», «Boshaqaı-1» jáne «Boshaqaı-2» kanaldaryn betondaý jobalarynyń júzege asyrylý barysymen tanysty. 

Bul jumystar Eýropalyq qaıta qurý jáne damý bankimen birlesken ırrıgatsııa jelilerin jańǵyrtý jobasy aıasynda únemdelgen qarajat esebinen júrgizilýde. Jalpy alǵanda únemdelgen qarjyǵa oblysta uzyndyǵy 85,5 shaqyrym bolatyn 14 kanaldy betondaý jobasy iske asyrylyp jatyr. Baızaq aýdanynda mınıstr «Ótemis», «Seńkibaı» jáne «Belqoja» sharýashylyqaralyq kanaldar júıelerindegi jumystardy tekserdi. «Ótemis» júıesinde jalpy uzyndyǵy 28 shaqyrym bolatyn ýchaskelerge beton tóselip, gıdrotehnıkalyq nysandar jóndelip jáne qaıta jańǵyrtylýda. Joba iske asqannan keıin júıe arqyly sýarylatyn jer kólemi 5131 gektarǵa deıin ulǵaıady. Qazir bul nysan 1626 gektar egistik alqapty sýarmaly sýmen qamtamasyz etip otyr.

«Seńkibaı» sharýashylyqaralyq kanalynda uzyndyǵy 17,8 shaqyrym bolatyn ýchaske rekonstrýktsııalandy. Jalpy 21,8 shaqyrym kanal jańǵyrtylady. Barlyq jumysty jyl sońyna deıin aıaqtaý josparlanǵan. «Belqoja» júıesin rekonstrýktsııalaý aıasynda jalpy uzyndyǵy shamamen 19,5 shaqyrym bolatyn ýchaskeler betonmen qaptalyp, gıdrotehnıkalyq nysandar jańartyldy. Qazirgi ýaqytta merdiger uıym anyqtalǵan eskertýlerdi joıý jumystaryn júrgizip jatyr.

Joba aıaqtalǵan soń júıe arqyly sýarylatyn jer kólemi 2896 gektarǵa deıin ulǵaıady. Búginde nysan 1860 gektar egistikke sý jetkizip otyr. Odan keıin mınıstr Islam damý bankiniń qoldaýymen júzege asyrylyp jatqan «Klımatqa tózimdi sý resýrstaryn damytý» jobasynyń birinshi kezeńine kiretin Novo-Mıhaılov kanalynyń jumystarymen tanysty. Baızaq aýdanynda osy joba aıasynda jalpy uzyndyǵy 64 shaqyrymnan asatyn 17 kanaldy jóndeý jáne qaıta jańǵyrtý kózdelgen. Jobalardy 2027 jyldyń sońyna deıin aıaqtaý josparlanǵan. Al Jambyl oblysy boıynsha jalpy uzyndyǵy shamamen 400 shaqyrym bolatyn 71 joba iske asyrylady.

— Oblysta kanaldardy betondaý men rekonstrýktsııalaý boıynsha aýqymdy jobalar júzege asyrylyp jatyr. Bul baǵytta úlken jumys atqarylýda. Sheteldik ınvestıtsııalar tartylyp jatyr. Sonymen qatar sharýalar sý únemdeý tehnologııalaryn belsendirek engizýi qajet. Bul júzege asyrylyp jatqan jobalardyń tıimdiligin arttyryp, sýarý kezinde sýdyń ysyrabyn edáýir azaıtýǵa múmkindik beredi. Memleket tarapynan bul úshin sýbsıdııalar túrinde barlyq qajetti jaǵdaı jasalǵan, — dedi Sý resýrstary jáne ırrıgatsııa mınıstri Nurjan Nurjigitov.

Baızaq aýdanynda mınıstr sondaı-aq jalpy uzyndyǵy shamamen 20 shaqyrym bolatyn «Sembet» jáne «Baızaq» magıstraldyq kanaldaryn betondaý jobasy aıasyndaǵy jer qazý jáne betondaý jumystarymen tanysty. Bul jumystar da EQQDB-men birlesken óńirdiń ırrıgatsııa jelilerin jańǵyrtý jobasy aıasynda únemdelgen qarajat esebinen júrgizilip jatyr. Sonymen qatar mınıstr MR-3 jáne MR-4 kanaldaryn aralady. Qazirgi ýaqytta josparlanǵan 24 shaqyrymnyń 13 shaqyrymynda qaıta jańǵyrtý jumystary aıaqtalǵan. Jobany jyl sońyna deıin tolyq aıaqtaý kózdelip otyr. Nátıjesinde 2,4 myń gektar sýarmaly jerge sýdyń turaqty jetkizilýi qamtamasyz etiledi.

Aıta keteıik, jyl sońyna deıin 105 gıdrotehnıkalyq nysanǵa kópfaktorly zertteý júrgiziledi.