Sý únemdeý: Túrkistan oblysynda 2026-2028 jyldary sýbsıdııalaýǵa 90 mlrd teńge bólinedi

ASTANA. KAZINFORM — Sý resýrstary jáne ırrıgatsııa mınıstri Nurjan Nurjigitov Jetisaı aýdanynyń sharýalarymen kezdesip, Túrkistan oblysyndaǵy sýarý maýsymyn qorytyndylady. Vedomstvo basshysy sharýalarǵa aýyl sharýashylyǵynda sý únemdeý tehnologııalaryn engizýdi yntalandyrý sharalary týraly aıtyp berdi.

Bıyl Sý resýrstary jáne ırrıgatsııa mınıstrligine berilgen jańa fýnktsııalar aıasynda 2026-2028 jyldarǵa arnalǵan jalpy sıpattaǵy transfertterdi qalyptastyrý jumystary júrgizilip jatyr. Osy transfertter esebinen aldaǵy úsh jylda Túrkistan oblysynda sý únemdeý tehnologııalaryn engizý men sýarmaly sý berý qyzmetterin ınvestıtsııalyq sýbsıdııalaý úshin shamamen 90 mlrd teńge qarastyrylǵan.

Aıta keteıik, byltyr mınıstrlik sý únemdeý tehnologııalaryn satyp alýǵa, ornatýǵa jáne ınfraqurylymdy júrgizýge jumsalǵan shyǵyndardy óteý úlesin 50%-dan 80%-ǵa deıin ulǵaıtty. Sonymen qatar sýarmaly sýǵa saralanǵan sýbsıdııalar engizildi. Eger sý únemdeý júıeleri qoldanylsa, sýbsıdııa kólemi 85%-ǵa deıin ósedi.

– Aptap ystyq pen jaýyn-shashynnyń bolmaýy Qazaqstannyń ońtústiginde kúrdeli jaǵdaı týǵyzdy. Alaıda jedel qabyldanǵan sharalardyń arqasynda ahýaldy turaqtandyryp, sýarmaly jerlerdi sýmen qamtamasyz ete aldyq. Mınıstrlik arnaıy jumys toptaryn quryp, ońtústik oblystardaǵy sý sharýashylyǵy jaǵdaıyna monıtorıng júrgizdi, sýarmaly sýdy ádil bólýge baqylaý jasady, kezekshilik kestelerin bekitti, zańsyz sý alýǵa qatysty tekserister júrgizdi jáne túsindirý jumystaryn atqardy. Bolashaqta mundaı qıyndyqtarǵa jol bermeý úshin sý únemdeý tehnologııalaryna belsendirek kóshý qajet. Osy maqsatta biz zamanaýı sýarý júıelerin engizýdi sýbsıdııalaý sharttaryn jetildirdik, – dedi Sý resýrstary jáne ırrıgatsııa mınıstri Nurjan Nurjigitov.

shSharýalar egistikterdi turaqty sýmen qamtamasyz etkeni úshin Sý resýrstary jáne ırrıgatsııa mınıstrligine alǵys bildirdi. Sondaı-aq mınıstr Nurjan Nurjigitov Jetisaı jáne Maqtaaral aýdandaryna sý jetkizetin «Dostyq» memleketaralyq kanalynyń jumysymen jáne jaǵdaıymen tanysty.

Mınıstrlik málimetinshe, Túrkistan oblysynyń Saýran aýdanynda egistik alqaptaryn qosymsha sýmen qamtamasyz etý úshin 72 tik drenajdy uńǵyma paıdalanýǵa berilgen. Al Ordabasy aýdanynda 17 tik drenajdy uńǵyma jóndeýden ótkizildi.

Sonymen qatar «Dostyq» memleketaralyq kanalynyń tómengi aǵysyndaǵy sharýa qojalyqtaryna sý berýdi jaqsartý jáne «Qazsýshar» RMK Túrkistan fılıalynyń kanaldarynda sý deńgeıin arttyrý úshin «Mashınalyq ádispen sý kóterý kanalynda» mehanıkalyq tazalaý jumystary júrgizildi.

Búginde óńirde egistik alqaptaryn sýarýǵa shamamen 3,3 mlrd tekshe metr sý alynǵan.

«Qazsýshar» RMK Túrkistan fılıaly sharýa qojalyqtarymen 297 myń gektar egistik jerdi sýarýǵa 9 724 kelisimshart jasasqan. Onyń 133,7 myń gektary maqta. Qazirgi tańda maqta alqaptaryn sýarý tolyq aıaqtaldy.

10 qyrkúıekke deıin fılıal kúrish alqaptaryn sýarýdy da tolyq aıaqtaýdy josparlap otyr. Sý berý jumystary bekitilgen kestege sáıkes júrgizilip jatyr.

Aıta keteıik, Qazaqstanda 580 myń gektardan astam alqapta sý únemdeý tehnologııasy qoldanylady.