Sý únemdeý tehnologııasy engizilgen egis alqaby 1,3 mln gektarǵa deıin jetkizilmek

- Sýdy utymdy paıdalaný úshin aýyl sharýashylyǵynda, ónerkásipte jáne turmysta sýdy únemdep, uqypty paıdalanýǵa baǵyttalǵan mádenıetti qalyptastyrýdyń mańyzy erekshe. Aýyl sharýashylyǵyndaǵy sýmen jabdyqtaý salasynda negizgi basymdyq zamanaýı, sý únemdeıtin sýarý ádisterine kóshýge berilip otyr. Osy maqsatta memlekettik qoldaý sharalary qaıta qaralyp, olar turaqty nátıje berip otyr. Eger 2023 jylǵa deıin sý únemdeý tehnologııalary engizilgen egis alqaptarynyń kólemi jyl saıyn orta eseppen 30 myń gektardy qurasa, Memleket basshysynyń tapsyrmasyn oryndaý aıasynda bul kórsetkish eselep ulǵaıyp, sońǵy eki jylda orta eseppen 150 myń gektardy qurady. Sý únemdeý tehnologııalary qoldanylatyn sýarmaly jerlerdiń alqaby 543,5 myń gektarǵa deıin ulǵaıdy, - dedi N. Nurjigitov.

Osy oraıda ol 2030 jylǵa qaraı bul kórsetkishti 1,3 mln gektarǵa deıin jetkizý josparlanyp otyrǵanyn aıtty. Osy maqsattarǵa jetý úshin 2026-2028 jyldarǵa arnalǵan respýblıkalyq bıýdjette 228 mlrd teńgeden astam qarajat kózdelgen, bul aldyńǵy úsh jyldyq kezeńmen salystyrǵanda tórt ese kóp (2023-2025 jyldar – 55,5 mlrd teńge).

- Ónerkásiptik sý paıdalanýdy damytý baǵytynda da jumys júrgizilip jatyr. Jańa Sý kodeksinde kásiporyndardyń sýdy qaıta paıdalaný jáne aınalymdy sýmen jabdyqtaý júıelerine kezeń-kezeńimen kóshý talaptary bekitilgen. Bul maqsatqa 7 jyl merzim belgilengen, onyń ishinde 2 jyl - ótpeli kezeńge, 5 jyl - josparlardy iske asyrýǵa arnalǵan. Bul sheshim 2030 jylǵa qaraı sýdy qaıta jáne aınalymdy paıdalaný úlesin 13%-dan 28%-ǵa deıin, ıaǵnı eki eseden astam arttyrýǵa múmkindik beredi. Munda belgilengen is-sharalardy oryndamaǵany úshin jaýapkershilik sharalary zańnamalyq turǵydan kózdelgen, sý paıdalaný lımıtterin 20%-ǵa deıin qysqartý sharalary qarastyrylǵan, - dedi vedomstvo basshysy.

Buǵan deıin habarlanǵandaı, Sý resýrstary jáne ırrıgatsııa mınıstri jóndelip jatqan sý qoımalaryna qatysty túsinik berdi.