Sý únemdeý tehnologııalarymen qamtylǵan alańdar 450 myń gektarǵa jetkizilmek
NUR-SULTAN. QazAqparat – Sý únemdeý tehnologııalarymen qamtylǵan alańdar 450 myń gektarǵa deıin jetkiziledi. Bul týraly Úkimet otyrysynda kanaldar men sý qoımalaryn salýdy talqylaý kezinde QR Ekologııa, geologııa jáne tabıǵı resýrstar mınıstri Serikqalı Brekeshev málim etti, dep habarlaıdy QazAqparat tilshisi.
Onyń aıtýynsha, osy jylǵy 1 qańtardaǵy jaǵdaı boıynsha sý únemdeý tehnologııalarymen qamtylǵan alań respýblıka boıynsha 248 myń gektardy qurady. Onyń ishinde ońtústik óńirde 1,25 mln gektardyń tek 5,4 paıyzy nemese 67,7 myń gektary ǵana engizilgen.
«2025 jylǵa qaraı Agroónerkásiptik keshendi damytý jónindegi ulttyq jobaǵa sáıkes, sý únemdeý tehnologııalarymen qamtylǵan alańdardy 450 myń gektarǵa deıin jetkizý josparlanyp otyr. Bul jyl saıyn 1,5 tekshe kılometr kóleminde sýdy únemdeýge múmkindik beredi. Osyǵan baılanysty, mınıstrlik Aýyl sharýashylyǵy mınıstrligimen jáne ákimdiktermen birlesip, alańdardy anyqtaı otyryp, barlyq oblystar boıynsha sý únemdeý tehnologııalaryn engizý jónindegi jol kartalaryn ázirleýdi jáne bekitýdi usynady», - dedi S. Brekeshev.
Aıta keteıik , qazirgi kezde 600 myń gektar sýarmaly jerdi qalpyna keltirýdi qamtamasyz etý úshin kanaldardy rekonstrýktsııalaý jáne sý qoımalardy salý boıynsha jumystar júrgizilip jatyr.
