Sý únemdeý tehnologııalaryn sýbsıdııalaýǵa bólinetin qarajat 4 ese ulǵaıtyldy
ASTANA. KAZINFORM — 2025 jyl Qazaqstannyń sý sharýashylyǵy salasyn damytýda aıryqsha mańyzǵa ıe boldy. Sý resýrstary jáne ırrıgatsııa mınıstrligi 12 aıdyń qorytyndysyn 10 negizgi kórsetkish arqyly usyndy.
Vegetatsııa kezeńinde turaqty sýarýǵa 11,1 mlrd tekshe metr sý alyndy. Aýyl sharýashylyǵy qurylymynda bul kólem salanyń jalpy ishki óniminiń 30 paıyzyna deıingi úlesin qamtamasyz etti. Egis alqaptaryna sý berýdi jaqsartý jáne ekologııalyq maqsattaǵy sý jiberýdiń tıimdiligin arttyrý maqsatynda 1840 km ırrıgatsııa kanaldary mehanıkalyq tazalaýdan ótti.
Sý únemdeý tehnologııalaryn qoldaný aýmaǵy 543,5 myń gektarǵa jetti. Osylaısha, Memleket basshysynyń jyl saıyn shamamen 150 myń gektar jańa alqapta sý únemdeý júıelerin engizý jónindegi tapsyrmasy oryndalyp jatyr. 2026-2028 jyldarǵa sý únemdeý tehnologııalaryn engizýdi sýbsıdııalaýǵa bólinetin qarajat 4 ese ulǵaıtyldy. Bul shara sharýalardy zamanaýı sýarý júıelerine kóshýge yntalandyrýǵa baǵyttalǵan.
237 eldi meken aýyz sýmen qamtamasyz etilip, sýmen qamtý sapasy jaqsartyldy. Jalpy alǵanda, 2025 jyly 449 myń adam sapaly aýyz sýǵa qol jetkizdi.
Sý sharýashylyǵy salasynyń negizgi kapıtalyna 579 mlrd teńge ınvestıtsııa tartyldy. Kelesi jyly Islam damý bankimen sý qoımalary men kanaldardy salý jáne rekonstrýktsııalaý boıynsha birlesken jobanyń alǵashqy kezeńi iske asyryla bastaıdy. «Qazsýshar» qyzmetkerleriniń jalaqysy 50%-ǵa deıin artty. Bul shara sý sharýashylyǵy salasyna qyzyǵýshylyqty arttyryp, kadrlyq áleýetti kúsheıtýge baǵyttalǵan.
«Qazsýshar» fılıaldaryna 576 jańa arnaıy tehnıka berildi. Bul tehnıkalar sý sharýashylyǵy nysandaryn salý, jóndeý jáne tazalaý jumystarynda belsendi qoldanylyp jatyr.
Sý sharýashylyǵy salasynyń 1000-nan astam mamany Qazaqstanda jáne shetelde biliktiligin arttyrdy. Olardyń ishinde 125 maman Qytaı kásiporyndarynda oqýdan ótti. QHR-men birlesken baǵdarlamany jalǵastyrý týraly kelisimge qol jetkizildi.
Qoǵamda sý únemdeý mádenıetin qalyptastyrýǵa baǵyttalǵan aktsııalarǵa 2 mıllıonnan astam oqýshy qatysty. Qazaqstan boıynsha sý únemdeý taqyrybynda ashyq sabaqtar, balalar arasynda sýret baıqaýlary, eko-jarystar jáne ózge de is-sharalar uıymdastyryldy.
Budan buryn Bozymbaev Sý resýrstary mınıstrligi sýdyń «qara naryǵyn» joıý is-sharalary josparyn ázirleýi tıis ekenin aıtqan edi.