Sý únemdeý tehnologııalary paıdalanylatyn egis alqabynyń aýmaǵy 86%-ǵa ulǵaıdy
ASTANA. KAZINFORM — Memlekettik qoldaý sharalarynyń nátıjesinde sý únemdeý tehnologııalary paıdalanylatyn egis alqabynyń aýmaǵy 86%-ǵa ulǵaıdy. Bul týraly Sý resýrstary jáne ırrıgatsııa mınıstrligi málim etti.
Vedomstvonyń dereginshe, Qazaqstanda 2024 jyldan beri sý únemdeý tehnologııalaryn jáne sýarý júıesin engizýge arnalǵan sýbsıdııa túrinde memlekettik qoldaý kórsetý boıynsha aýqymdy jumys júrgizilip jatyr. Sharýalardyń ınfraqurylym tartý, sý únemdeý júıelerin satyp alý jáne ornatý shyǵyndaryn óteý úlesi 50%-dan 80%-ǵa deıin ulǵaıtyldy. Sondaı-aq tarıf qunyna baılanysty sýarmaly sýǵa sýbsıdııanyń saralanǵan mólsheri engizildi.
— Qabyldanǵan sharalardyń nátıjesinde sý únemdeý tehnologııalaryn qoldaný aýmaǵy 86%-ǵa ulǵaıdy. Naqtyraq aıtqanda, 2023 jylǵy 312,2 myń gektardan bıyl shamamen 581 myń gektarǵa jetti. Memlekettik qoldaý sý únemdeý tehnologııalaryn shyǵarý naryǵynyń damýyna da yqpal etti. 2024 jyly Túrkistan oblysynda, Almaty jáne Astana qalalarynda jańbyrlatyp jáne tamshylatyp sýarý jabdyqtaryn jasap shyǵaratyn tórt otandyq zaýyt ashyldy. Bıyl Jambyl oblysynda tamshylatyp sýarý júıelerin shyǵaratyn qazaq-qytaı birlesken jobasy iske qosyldy. Kásiporynnyń óndiristik qýaty 14 myń gektar alqapty tamshylatyp sýarý lentalarymen qamtýǵa múmkindik berdi, — delingen habarlamada.
Túrkistan qalasynyń ındýstrııalyq aımaǵynda tamshylatyp sýarý júıesine arnalǵan plastık qubyr óndirisi iske qosyldy. Jetisaı aýdanynyń ındýstrııalyq aımaǵynda polıetılendi qaıta óńdeý jáne sý únemdeý jabdyqtaryn óndirýdi iske qosý jumystary júrip jatyr. Al Maqtaaral aýdanynyń ındýstrııalyq aımaǵynda jyl sońyna deıin plastık qubyrlar, lentalar jáne tamshylatyp sýarý qurylǵylaryn shyǵaratyn óndiris iske qosylmaq. Qyzylorda oblysynda túrik ınvestorlary jobalyq qýaty 20 myń gektar bolatyn tamshylatyp sýarý júıelerin jasaıtyn zaýytty iske qosýdy josparlap otyr.
— Memleket basshysynyń tapsyrmasyna sáıkes, biz elimizdiń sý salasyna ınvestıtsııa tartý jumysyn belsendi júrgizip jatyrmyz. Halyqaralyq áriptestermen yntymaqtastyq zamanaýı tehnologııalar men ınvestıtsııalarǵa jol ashady, biraq barlyq strategııalyq sheshim tek Qazaqstanda qabyldanady. Sý resýrstary buryn da, qazir de tikeleı memleket baqylaýynda jáne solaı qala beredi de. Ásirese mańyzdy sý nysandaryn shet memleketterdiń qoldanysyna berý máselesi eshqashan qaralǵan emes. Bizdiń basty maqsatymyz — azamattarymyzdyń múddelerin qorǵaý úshin sý sharýashylyǵyn jańartyp, jetildirý jáne ulttyq qaýipsizdikti qamtamasyz etý. Sý — óte mańyzdy strategııalyq resýrs. Biz ár tamshysyn tıimdi paıdalanyp, únemdeý baǵytynda jumys istep jatyrmyz. Bul — elimizdiń bolashaǵy úshin asa mańyzdy,— dedi Sý resýrstary jáne ırrıgatsııa mınıstri Nurjan Nurjigitov.
Aıta keteıik, Túrkistan oblysynda sý qoımasyn rekonstrýktsııalaý jumystary jaqynda aıaqtalmaq.