Sý únemdeý tehnologııalary arqyly byltyr 874 mln tekshe metr sý únemdeldi – mınıstrlik esebi
ASTANA. KAZINFORM – Sý resýrstary jáne ırrıgatsııa mınıstri Nurjan Nurjigitov Sý resýrstaryn basqarý júıesin damytýdyń 2030 jylǵa deıingi tujyrymdamasyn iske asyrý máseleleri boıynsha keńes ótkizdi.
2025 jyldyń qorytyndysy boıynsha mınıstrlik sýarmaly eginshilikte sý únemdeý tehnologııalaryn engizý arqyly 874 mln tekshe metr sý únemdedi. Bul josparlanǵan 728 mln tekshe metrden joǵary kórsetkish. Sonymen qatar sýdy tasymaldaý kezindegi shyǵyndardy 50%-dan 25%-ǵa deıin azaıtý maqsatynda 678 shaqyrym kanal qaıta jańǵyrtyldy. Bul jumys josparǵa tolyq sáıkes atqaryldy.
Josparda kózdelgen 1921 myń gektardyń ornyna 2365,3 myń gektar aýmaqta sýarmaly jerlerdiń melıoratıvtik jaǵdaıyna monıtorıng pen baǵalaý júrgizildi. Sý sharýashylyǵy salasynyń 763 mamany biliktilikti arttyrý kýrstarynan ótti, al maqsatty kórsetkish 400 maman edi. Sondaı-aq 2025 jylǵa arnalǵan transshekaralyq sý nysandaryn paıdalaný jáne qorǵaý jónindegi kelissózderge qatysatyn top músheleriniń biliktiligin arttyrý jospary tolyq oryndaldy.
Sondaı-aq aıaqtalý merzimi 2025 jylǵa belgilengen toǵyz is-shara iske asyryldy. Olardyń qatarynda Sý resýrstarynyń ulttyq aqparattyq júıesin qurý, Qazaqstan men Ózbekstan úkimetteri arasynda transshekaralyq sý nysandaryn birlesip basqarý jáne paıdalaný týraly kelisimdi ázirleý jáne oǵan qol qoıý, sondaı-aq sýarmaly eginshilikte qoldanylatyn eń úzdik qolda bar sý únemdeý tehnologııalarynyń tizimin qalyptastyrý jáne ózge de jumystar bar.
– Bıyl Tujyrymdamada kózdelgen barlyq ındıkatordyń tolyq oryndalýyn qamtamasyz etý qajet. Ásirese sý sharýashylyǵy ınfraqurylymyn salý, jańǵyrtý jáne rekonstrýktsııalaý baǵytynda. Sondaı-aq basqa memlekettik jáne jergilikti atqarýshy organdarmen ózara is-qımyldy kúsheıtý kerek. Tujyrymdama – bul jaı usynys emes, ol maqsattary tolyq kólemde oryndalýy tıis strategııalyq qujat, - dedi Sý resýrstary jáne ırrıgatsııa mınıstri Nurjan Nurjigitov.
Buǵan deıin 2026 jyly úsh birdeı toptyq sý qubyry qoldanysqa beriletinin habarlaǵanbyz.