Sý únemdeý mádenıetin qalyptastyrýǵa arnalǵan jańa bilim berý resýrsy ázirlenip jatyr
ASTANA. KAZINFORM – Halyqtyń ekologııalyq mádenıetin arttyrý jumystary aıasynda Sý resýrstary jáne ırrıgatsııa mınıstrligi bilim berý úderisinde jáne balalar men jastarmen júrgiziletin synyptan tys jumystarda paıdalanýǵa arnalǵan «Sý sandyǵy» oqý-ádistemelik resýrsyn ázirlep jatyr.
Resýrsqa taqyryptyq oqý materıaldary, praktıkalyq tapsyrmalar men jattyǵýlar, aqparattyq jáne ádistemelik ázirlemeler, ekologııalyq ertegiler, sondaı-aq «Sý izi» platformasyn qosa alǵanda, tsıfrlyq quraldar engizilgen. Materıaldar oqýshylardyń jas erekshelikterin eskere otyryp ázirlengen. Olardy pedagogter sabaqtarda, ekologııalyq saǵattarda, synyptyq jáne synyptan tys is-sharalarda paıdalana alady.
«Sý sandyǵyn» toltyrý boıynsha jumys sý resýrstary, bilim berý jáne ekologııalyq aǵartý salasyndaǵy mamandardyń qatysýymen júrgizilip jatyr. Qazirgi ýaqytta materıaldardyń basym bóligi qalyptastyrylyp, olardy bilim berý uıymdaryna taratýǵa daıyndaý jumystary aıaqtalýǵa jaqyn.
— «Sý sandyǵy» mınıstrlik jobalary aıasynda jınaqtalǵan ekologııalyq aǵartý jáne sý únemdeý mádenıetin qalyptastyrýǵa baǵyttalǵan materıaldar men tájirıbelerdi biriktirdi. Endi bul bilim men quraldar bir resýrsta jınaqtalyp, pedagogterge olardy balalar men jastarmen jumys barysynda paıdalanýǵa múmkindik beredi, — dedi «Sý resýrstarynyń aqparattyq-taldaý ortalyǵy» KEAQ basqarma tóraǵasy Qaıratǵalı Haırýlla.
Jumystar aıaqtalǵannan keıin «Sý sandyǵy» resýrsy eldegi bilim berý uıymdaryna oqý protsesinde jáne synyptan tys jumystarda paıdalaný úshin beriledi.
Aıta ketelik mektep pánderiniń mazmuny jasandy ıntellekt baǵytynda jańartylyp jatyr.
