Sý únemdeý, qýańshylyqqa qarsy tózimdilik: Qazaqstan Germanııadaǵy qaýymdastyqpen kelisim jasady
ASTANA. KAZINFORM - Sý resýrstary jáne ırrıgatsııa mınıstrligi Germanııanyń German Water Partnership (GWP) qaýymdastyǵymen Strategııalyq áriptestik týraly kelisimge qol qoıdy.
Buǵan vıtse-premer Qanat Bozymbaev pen GWP basshylyǵy arasynda osydan bir jyl buryn Germanııada ótken kelissózder bastama boldy. German Water Partnership – Germanııanyń sý salasyndaǵy halyqaralyq qaýymdastyǵy. Ol sý resýrstary salasyndaǵy 300-den astam uıymdy biriktiredi.
Qaýymdastyq músheleriniń qatarynda ýnıversıtet deńgeıindegi ınstıtýttar, qurylys kompanııalary, konsýltanttar men álemge tanymal óndirýshiler bar. Kelisim Qazaqstanǵa sý únemdeý tehnologııalaryn engizý, ınnovatsııalyq sheshimderdi paıdalaný, klımattyq qaterlerge, sý tasqyny men qýańshylyqqa qarsy tózimdilikti arttyrý, sondaı-aq mamandardy oqytý jáne daıarlaý kezinde úzdik halyqaralyq tájirıbelerdi qoldanýǵa múmkindik beredi.
Búgingi tańda Germanııa tájirıbesi sý resýrstaryn boljaý, modeldeý jáne esepke alý boıynsha tsıfrlyq jobalardy júzege asyrýda qoldanylyp keledi.
Nemis tehnologııalary gıdrotehnıkalyq nysandardyń qurylysy kezinde de paıdalanylyp jatyr.
Vıtse-premer Qanat Bozymbaev pen GWP atqarýshy dırektory Borıs Graıfender yntymaqtastyqtyń keleshegin talqylady.
Kezdesýde German Water Partnership-tiń qoldaýymen Sý resýrstary jáne ırrıgatsııa mınıstrliginiń Aqparattyq-taldaý ortalyǵy bazasynda Qazaqstan-Germanııa sý ınnovatsııalyq habyn qurý usynyldy.
Kelisimge qol qoıylǵan soń taraptar qujat jańa birlesken qazaqstandyq-germandyq jobalardy damytýǵa berik negiz bolatynyna senim bildirdi.
Eske salsaq, Qasym-Jomart Toqaev Túrki memleketteri uıymynyń HІІ sammıtinde sý tapshylyǵy taıaý arada Orta Azııadaǵy eń ózekti syn-qater bolýy múmkin ekenin aıtty.