Sý únemdep, ónimdi arttyrý: Túrkistandyq dıqandarǵa 1,6 mlrd teńge sýbsıdııa tólendi

ASTANA. KAZINFORM — Túrkistandyq sharýalar qýańshylyqtan zardap shekpes úshin tamshylatyp jáne jańbyrlatyp sýarý júıesin keńinen qoldanyp jatyr. Bul tehnologııa sýdy 2 ese únemdep, ónimdi 3 ese arttyrady, dep habarlaıdy Jibek Joly arnasy.

Al ketken shyǵyndy memleket óteıdi. Dıqandarǵa búginge deıin 1 mlrd 600 mln teńge sýbsıdııa tólengen.

Jetisaılyq sharýalar birneshe jyldan beri sý tapshylyǵyn sezinip keledi. Al tyǵyryqtan shyǵýdyń birden-bir joly tamshylatyp sýarý ádisine kóshý. Máselen, bul sharýaqojalyq 230 gektarǵa maqta ekken. Onyń 170 gektaryna tamshylatyp sýarý ádisi engizilgen.

— Jyldan jylǵa jaqsaryp kele jatyrmyz. Jańa tehnologııalar shyǵyp qazir. Nasostar qoıylyp, fıltratsııa degen nárseler kelgen, ózimizdiń otandyq ónim. Osy arqyly kóremiz endi tamshylatyp sýarýdan, — dedi sharýa qojalyq qyzmetkeri Atabek Tashmetov.

Jetisaı aýdanynda qazir 6 myń gektarǵa jýyq jerge sý únemdeý tehnologııasy engizilgen. Jyl sońyna deıin bul kórsetkishti 8 myń gektarǵa jetkizý josparlanǵan. Bul — oblys boıynsha eń joǵary kórsetkishterdiń biri.

— Jyl sońyna deıin jalpy jospardy oryndaımyz degen úmittemiz. Munyń maqsaty — sý únemdeý, mol ónim alý maqsatynda iske asyp jatqan jobalar. Bizde MTS ashylǵan. Jańa tehnologııalar kelgen. Buryn júıektiń qashyqtyǵy 90-dyq bolsa, 76-lyqpen de egip kórip jatyrmyz. Ónimdi kóbeıtý maqsatynda, — dep atap ótti Jetisaı aýdany aýyl sharýashylyǵy bólimi basshysynyń mindetin atqarýshy Erqýat Turǵynbaev.

Sý únemdeý júıesiniń gektaryna ketetin ortasha shyǵyny — 800 myń teńge. Biraq bul qarajat dıqandardyń qaltasynan shyqpaıdy. Sharýalarǵa jańa tehnologııany engizgen jaǵdaıda ketken shyǵynnyń 80%-in memleket sýbsıdııalap beredi.

— Sý únemdeý tehnologııalaryn engizgeni úshin 80 paıyzǵa deıin memleketten sýbsıdııa tóleý qarastyrylǵan. Qazirgi tańda 1,6 mlrd astam qarjyǵa osy baǵytta tıisti sýbsııadııalar tólendi, — deıdi Túrkistan oblysy Aýyl sharýashylyǵy basqarmasy basshysynyń orynbasary Álibek Plalov.

Aǵyn sýdyń 70%-in kórshi elden alatyn Túrkistan oblysynyń sharýalary úshin sýarý maýsymynda tirshilik náriniń quny artady. Al jahandyq jylyný men sý resýrstarynyń tapshylyǵy jaǵdaıynda tamshylatyp sýarý ádisi- tıimdi sheshim bolyp tur.

Budan buryn Qazaqstanda shamamen 85 myń gektar jer sý únemdeý tehnologııasymen sýarylatyny anyqtaldy.