Sý únemdegenderdi qoldaýǵa 214,6 mlrd teńge bólinetin boldy
ASTANA. KAZINFORM — Sý resýrstary jáne ırrıgatsııa mınıstrligi resmı saýalymyzǵa joldaǵan jaýabynda sý únemdeý baǵytynda qabyldanyp jatqan sharalardy málimdedi.
Mınıstrlik málimetinshe, memleket sý únemdeý tehnologııalaryn engizýdi yntalandyrýǵa kúsh salyp keledi.
– Atap aıtqanda, fermerlerdiń sý alý jáne berý ınfraqurylymyn júrgizýge, sý únemdeý tehnologııalaryn satyp alýǵa jáne ornatýǵa jumsaǵan shyǵyndaryn óteý úlesi 50%-dan 80%-ǵa deıin ulǵaıtyldy. Sondaı-aq, paıdalanylatyn tehnologııa men tarıfke baılanysty sý berý qyzmetiniń quny sýbsıdııalanady, – delingen habarlamada.
Sý resýrstary jáne ırrıgatsııa mınıstrligi sý únemdegender úshin bólingen qarjy týraly da aqparat berdi. 2026-2028 jyldarǵa sý únemdeý tehnologııalaryn engizýge arnalǵan ınvestıtsııalyq sýbsıdııalarǵa 214,6 mlrd teńge qarastyrylǵan. Onyń ishinde:
• 2026 jyly – 58,5 mlrd teńge;
• 2027 jyly – 74,6 mlrd teńge;
• 2028 jyly – 81,5 mlrd teńge sýbsıdııa retinde jumsalmaq.
Sonymen qatar, sý berý qyzmetiniń qunyn da sýbsıdııalaý kózdelgen. Bul maqsatqa jalpy 13,5 mlrd teńge qarastyrylǵan. Onyń ishinde 2026 jyly – 4 mlrd, 2027 jyly – 4,7 mlrd, 2028 jyly – 4,8 mlrd teńge bólinedi.
Odan bólek, sý únemdegen sharýalarǵa sýaraý qurylǵylary jeńildikpen satylady.
– Sý únemdeý tehnologııalaryn engizýge jeńildetilgen qarjylandyrý quraldary qoldanylady. «QazAgroQarjy» AQ-nyń «Agrolızıng» baǵdarlamasy sheńberinde jańbyrlatyp sýarý júıeleri jyldyq 12,6% mólsherlememen 10 jylǵa deıin, al tamshylatyp sýarý júıeleri 12,6% mólsherlememen 5 jylǵa deıin qarjylandyrylady. Qazirgi ýaqytta elde jańbyrlatyp sýarý mashınalary men tamshylatyp sýarý jabdyqtaryn óndiretin 7 otandyq zaýyt jumys isteıdi, – delingen resmı jaýapta.
Aıta keteıik, buǵan deıin eldiń ońtústigindegi oblystarda belgilengen sý lımıti qandaı nátıje bergenin jazǵanbyz.
