Sý tutyný esebi tsıfrlyq júıege kóshedi
ASTANA. KAZINFORM — Qazaqstanda sý shyǵynyn baqylaý, qubyrlardaǵy aqaýlardy der kezinde anyqtaý jáne kommýnaldyq tólemderdiń ashyqtyǵyn qamtamasyz etý úshin tsıfrlyq júıeler engizilip jatyr.
Bul týraly Ortalyq kommýnıkatsııalar qyzmetinde ótken brıfıngte QR Ónerkásip jáne qurylys mınıstrliginiń ókilderi málimdedi.
Tsıfrlandyrýdyń negizgi quraldarynyń biri — Smart Turmys platformasy. Ol abonentter, sý tutyný kólemi jáne kommýnaldyq tólemder týraly málimetterdi biriktiredi.Bul kásiporyndardyń jumysyn ońtaılandyryp, turǵyndarǵa esep aıyrysý týraly ashyq aqparat alýǵa múmkindik beredi.
— Ulttyq joba aıasynda turǵyn úı-kommýnaldyq sharýashylyǵyn tsıfrlyq transformatsııalaýǵa baǵyttalǵan biryńǵaı Smart Turmys platformasy qurylyp jatyr. Birinshi kezeńde 25 qaladaǵy 32 sýmen jabdyqtaý kásiporny avtomattandyrý jáne esepke alý quraldaryn engizý úshin jalpy somasy 54 mlrd teńgege ótinim bergen. Onyń ishinde jalpy quny 12 mlrd teńge bolatyn segiz ótinim boıynsha merdigerlermen kelisimshart jasaldy. Taǵy jeti ótinim boıynsha konkýrstyq rásimder júrip jatyr. Olardyń jalpy quny — 17 mlrd teńge, — dedi QR Ónerkásip jáne qurylys mınıstrligi Qurylys jáne turǵyn úı-kommýnaldyq sharýashylyq isteri komıtetiniń tóraǵasy Baqytjan Júnisbekov.
Tsıfrlandyrý jumystary basqa 62 sý arnasy kásipornynda da júrgizilýde. Jańa júıeler sý shyǵyny men jelilerdegi qysymdy baqylaýǵa, jabdyqtardyń jumysyn qadaǵalaýǵa múmkindik beredi. Sonyń arqasynda sý aǵýyn erte anyqtap, apattyq jaǵdaılarǵa jedel áreket etýge bolady.
Aıta keteıik, Túrkistan oblysynda sharýalardy sý únemdeýge úıretetin «Sý mamandary mektebi» qurylady.
