Sý – taýar emes, ómirlik resýrs ekenin túsinetin ýaqyt keldi – Erlik Qarajan

ALMATY. QazAqparat – Almatyda BUU úıinde Turaqty damý maqsattaryn qarjylandyrý máseleleri boıynsha birinshi aımaqtyq sammıt óz jumysyn bastady, dep habarlaıdy QazAqparat tilshisi.

Sammıttiń kúntizbesinde sý resýrstaryn ratsıonaldy qoldanýdyń, arzan elektr energııasynyń qoljetimdiligi, klımattyń ózgerýine qarsy kúres sharalaryn qarjylandyrý máselesi qaraldy.

Jobanyń úılestirýshisi, QR Ulttyq ekonomıka mınıstriniń shtattan tys keńesshisi Erlik Qarajan sý resýrstarynyń tapshylyǵy kezek kúttirmeıtin másele ekendigin aıtty.

«Búgin 2030 jyly bolýy yqtımal problema týraly aıtyp jatyrmyz. Oǵan nebári 10-aq jyl qaldy. Bul suraq óte ózekti ári kúrdeli. Klımat qatty ózgerip kele jatyr. Bunyń salqyny Qazaqstanǵa da tıeri sózsiz. Qazaqstanda tabıǵı apattardyń sany arta túsedi. 2020 jylǵa taman ózen sýlary arnasynan tasyǵanmen odan keıin qurǵaqshylyq bastalady. Óıtkeni, muzdyqtar erip ketedi. Aýyl sharýashylyǵyna úlken qaýip tónedi. Osy stsenarııdi ózgertý úshin búgin Orta Azııa elderiniń ókilderi bas qosyp otyr. Sý resýrstaryn qazirgi kólemde qoldana bersek, munyń arty tapshylyqqa ákeledi», - dedi Erlik Qarajan.

Onyń aıtýynsha, BUU bastamasymen qurylǵan Turaqty damý maqsattarynda osy baǵytta birneshe mindet mejelengen.

Qujatta kórsetilgen 12 maqsat, 169 mindet, 300 usaq ındıkatordy kez-kelgen memleket jaýapkershilikpen oryndaýy tıis.

«Qazaqstan ózdiginen eshnárse sheshe almaıdy. Tek Orta Azııa elderimen birikken kezde ǵana ortaq problemanyń sheshimin tabamyz. Eń aldymen sý resýrstarynyń ortaq ınstıtýtsıonaldy bazasy qurylýy tıis. Óıtkeni, Keńes zamanyndaǵy zertteý jumystary óziniń ózektiligin joıdy. Sý taýar emes, únemdemegen jaǵdaıda taýsylatyn ortaq resýrs ekenin túsinetin kez keldi. Ár memleket osyny túsinýi kerek», - dedi Erlik Qarajan.

Halyqaralyq sarapshylar memleket, bıznes, álemdik ınstıtýttar arasyndaǵy ózara yntymaqtastyq aıasynda Turaqty damý maqsattaryn qarjylandyrý týraly tájirıbelerimen bólisip jatyr.

Sammıt jumysynda Orta Azııa ókilderi, ekologııa, týrızm, qurylys salasyndaǵy aımaqtyq sarapshylar qatysyp jatyr.

Sonymen qatar, qazaqstandyq áriptesterimen pikir almasýǵa Nobel syılyǵynyń laýreaty, Elshi Rae Kvon Chýng, Qazaqstandaǵy BUU turaqty úılestirýshisi Norımas Shımomýra, Qyrǵyzstannyń eks prezıdenti Roza Otýnbaeva, Búkilálemdik bank ókilderi keldi.