Sý tasqynynyń zardaptaryn joıý úshin 6,3 mlrd teńge qarjy qajet - Málik Myrzalın
KÓKShETAÝ. QazAqparat - Aqmola oblysynda kóktemgi sý tasqynynyń zardaptaryn joıý úshin 6,3 mlrd teńge qarjy qajet. Bul týraly óńirlik kommýnıkatsııalar qyzmetinde jergilikti buqaralyq aqparat quraldarynyń ókilderimen ótken baspasóz máslıhatynda aımaq basshysy Málik Myrzalın málim etti, dep habarlaıdy «QazAqparat» HAA tilshisi.
Aımaq basshysynyń aıtýynsha, kóktemgi sý tasqyny kezinde oblystaǵy 7 aýdanynyń 34 eldimekenindegi 839 turǵyn úı sýda qalǵan.
Ásirese, Atbasar aýdany qatty zardap shegip, 650 astam nysan, onyń 644-i turǵyn úı sýda qaldy. Oǵan qosa, kólik kommýnıkatsııasyna aıtarlyqtaı zalal kelgen.
Tabıǵat apatynyń zardaptaryn joıýǵa oblystyq 513 mıllıon teńge qarjy bólinse, onyń 189 mıllıon teńgesi zardap shekkenderge bir rettik járdemaqy tóleýge jumsaldy.
«Sońǵy 4 jylda Jabaı ózeniniń arnasynan asýy atbasarlyqtardyń turmysyna keri áserin tıgizýde. Sol sebepti, atalmysh máseleni sheshý úshin oblys ákimdigi tarapynan QR Úkimetine Jabaı ózenin boılaı qorǵanys bógetin salý úshin tehnıkalyq saraptama komıssııasyn qurý týraly usynys jasaldy», - dedi oblys ákimi.
Arnaıy qurylǵan komıssııa aǵymdaǵy jyldyń 9 maýsymynda Atbasar qalasynda bolyp, Jabaı ózeniniń sý basý qaýpi joǵary aýmaqtaryn zerttegen. Komıssııa qorytyndysy boıynsha ózen jaǵasyn boılaı úıilgen topyraq tótenshe jaǵdaıdy aldyn almaq.
