Sý tasqynynyń qaýpi joǵary - SQO ákiminiń orynbasary
PETROPAVL. QazAqparat - Soltústik Qazaqstan oblysy aldaǵy sý tasqynyna daıyndalyp jatyr, dep xabarlaıdy QazAqparat tilshisi.
Oblys ákiminiń orynbasary Anton Fedıaev ákimdik jınalysynda aǵymdaǵy jaǵdaı týraly xabarlady. Onyń aıtýynsha, Esil ózenindegi sý deńgeıi byltyrǵy kórsetkishterden aspaǵan.
Sınoptıkterdiń boljamy boıynsha, naýryzda jaýyn-shashyn mólsheri normadan asady. Topyraqtaǵy ylǵal deńgeıi byltyrǵydan 1,5-2 esege kóbeıgen.
«Sergeev sý qoımasynda sýdyń mólsheri - 95,5%. Bul byltyrǵydan 2% joǵary bolsa, Petropavl sý qoımasynda 89,8 % qurap otyr. Sý tasqynynyń qaýpi joǵary. Sý tasqynyna daıyndyq jumystaryn jalǵastyrý qajet. Eń aldymen, eldi mekender aýmaǵynan qarlardy shyǵarý kerek», - dedi A.Fedıaev.
Ol ótken jyly «2017-2020 jyldary sý tasqyny qaýpiniń aldyn alý jáne joıý boıynsha sharalar kesheni» jol kartasynda josparlanǵan barlyq is-sharalardyń oryndalǵanyn atap ótti.
«Barlyq 26 gıdrotexnıkalyq qurylǵy daıyn. Sharyq sý toraby apatty jaǵdaıda tur. Odan eshqandaı qaýip joq, sebebi sý qoımasy bos tur. Bıyl Aýyl sharýashylyǵy mınıstrligi sý torabyn qalpyna keltirýdi bastaýy kerek», - dep atap ótti A.Fedıaev.
Kóktemgi sý tasqyny kezeńine óńirdegi 708 texnıka, 331 sý aıdaıtyn qurylǵy, 1,4 myń adamnan quralǵan top daıyn tur. 525 mln teńge kóleminde oblystyq rezerv quryldy.
