Sý tasqynynan zardap shekken SQO-daǵy Rýzaevka aýylynyń turǵyndary baspanaly boldy
PETROPAVL. QazAqparat - Rýzaevka aýylynda sý tasqynynan zardap shekkenderge alǵashqy ótemaqylaryn tóleı bastady, dep habarlaıdy «QazAqparat» HAA tilshisi óńirlik OKQ-ǵa silteme jasap.
Ǵ.Músirepov atyndaǵy aýdan ákimi Vladımır Dýdovtyń aıtýynsha, oblystyq ákimdiktiń qorynan tabıǵı apattyń zalalyn óteý úshin 53,5 mln teńge bólindi. Rýzaevka aýylynyń kómek qoryna 19 mln bıýdjetten tys qarjy tústi.
Sý tasqyny Rýzaevka aýylyndaǵy 12 úıdi qıratty. Bul otbasylarǵa bıýdjettik jáne bıýdjetten tys qarjy esebinen úıler men páterler satyp alyp berildi.
Seralınder otbasy jańa úıge kóshken alǵashqy otbasylardyń biri. Sý tasqyny kezinde Elvıra Seralına tek qujattaryn ǵana alyp úlgergen, olardyń basqa dúnıeleri sý astynda qalǵan. Olar úıdi uzaq tańdaǵanyn jasyrmady.
«Bizge úsh úı kórsetti. Bizdiń tańdaǵan úıimiz 2 mln teńge turady. Úlken, keń ári barlyq jaǵdaı jasalǵan - kólikjaı, monsha, baqsha, birneshe bólmeleri bar. Úıdiń burynǵy ıesi bizge barlyq jıhazdar men tehnıkany qaldyryp ketti. Bizge qolushyn sozǵan barlyq adamdarǵa alǵys aıtqym keledi», - dedi Rýzaevka aýylynyń turǵyny Elvıra Seralına.
Lılııa Afanaseva da jańa páterde qonys toıyn toılady. Áıelge bir bólmeli páter tıdi. Ol óziniń eski úıinen jıhazdary men turmystyq tehnıkalaryn jańa baspanasyna jetkizip aldy.
Rýzaevka aýylynyń turǵyndaryna qoldaý kórsetý úshin qaıyrymdylyq is-sharasy ótkizildi. Barlyǵy 9 mıllıon teńge jınaldy. Bul qarjyǵa azyq-túlik, kıim-keshek, aıaq-kıim, qurylys materıaldary, turmystyq tehnıka satyp alyndy. Rýzaevka aýyldyq okrýginiń ákimi Igor Kobıalkonyń aıtýynsha, aýylda 88 otbasy qıyn jaǵdaıǵa tap bolǵan.
Ǵ.Músirepov atyndaǵy aýdanda sý tasqyny kezinde 120 úıdi sý aldy, onyń 108-i - Rýzaevka aýylynda, 8 úı Andreevka aýylynda, qalǵany Chıstopole aýylynda ornalasqan.
