Sý tasqynynan zardap shekken maqtaaraldyq 152 oqýshy shıpajaıǵa attandy
MAQTAARAL. QazAqparat – Maqtaaral aýdanyndaǵy topan sýdan zardap shekken aýyldardyń balalary emdik-saýyqtyrý shıpajaıyna attandy. Jetkinshekter dárigerlik esepte turǵan jáne kópbalaly otbasynan shyqqan, dep habarlaıdy QazAqparat tilshisi.
Igilikti iske Túrkistan oblystyq qoǵamdyq densaýlyq basqarmasy uıytqy bolyp otyr. Jeńis, Nurly jol, Jantaqsaı, Jańa turmys, Órgebas, Ferdaýsı eldimekenderinde turatyn oqýshylardi jetkizý birqatar medıtsına qyzmetkerlerine júkteldi. ıAǵnı, oqýshylardy shyǵaryp salý úshin barlyq qaýipsizdik sharalary qolǵa alynyp, jol polıtsııasy men jedel járdem qyzmeti de jumyldyrylǵan.
Oqýshylardy shyǵaryp salý sharasyna qatysqan Maqtaaral aýdandyq bilim bóliminiń basshysy Muratbek Serikbaev balalardyń qashyqtyqtan oqytylatynyn jáne esh kedergisiz oqý jylyn aıaqtap shyǵatynyn atap ótti.
Aıta keteıik, qazirgi tańda topan sýdan zardap shekken 5 aýyldyń 2600-den asa turǵyny Atakent kentindegi 8 evakýatsııalyq pýnktige jaıǵasqan. Onyń ishinde 770-i - mektep oqýshylary bolsa, 256-sy - mektep jasyna jetpegen búldirshinder. Qalǵan evakýatsııalanǵan turǵyndar aǵaıyn-týystarynyń úınde turyp jatyr.
Sý tasqynynan zardap shekken turǵyndardyń baspanasy tolyq bitip, jańa qonysqa jaıǵasqansha olardyń balalary elimizdegi demalys-saýyqtyrý lagerlerine joldaý josparlanyp otyr.
Búgin 152 oqýshydan bólek, evakýatsııalanǵan turǵyndardyń arasynan 47 zeınetker men sozylmaly aýrýy bar bir top naýqas «Birkólik» ońaltý keshenine demalysqa jiberildi. Aldaǵy eki aptada olarǵa da em-dom sharalary kórsetilmek.
