Sý tasqynynan zardap shekken qaraǵandylyqtarǵa mamyr aıynda ótemaqy tólenedi
QARAǴANDY. QazAqparat - Qaraǵandy oblysynda mamyrda sý tasqynynan zardap shekkenderge ótemaqy tólenedi, dep habarlady «QazAqparat» HAA tilshisi.
Qaraǵandy oblysynyń ákimi Erlan Qoshanov Buqar Jyraý aýylynyń Chkalovo jáne Sadovoe kentine bardy. Ol jerlerde 91 úıdi sý basty. Óńir basshysy zardap shekken turǵyndarmen kezdesti. Ol barlyǵyna materıaldyq kómek kósretiletinin aıtty.
«Oblys sý tasqynynyń kúrdeli kezeńinen ótti, óńirde joǵary deńgeıdegi ázirlik rejimi alynady. Sýdyń mólsherden tys kóp bolǵanyna qaramastan, onyń saldaryn azaıttyq, - dedi oblys ákimi Qoshanov. 
«253 mıllıon tekshe metr syıymdylyqpen Samarqan sý qoımasy arqyly úsh mólsherden artyq sý shyǵaryldy»,-dep qosty ol.
«Ótken jyly osy sý qoımasy arqyly 760 tekshe metr, bıyl 85 mln tekshe metr sý shyǵaryldy. Bul 100 mıllıon tekshe metrge kóp. Sý kólemi kóp boldy, biraq 2015 jylǵa qaraǵanda, jumys retti atqaryldy», - dedi oblys ákiminiń orynbasary Andreı Lıapýnov.
Búgin Samarqan sý qoımasynan sý jiberý sekýndyna 240 tekshe metr jyldamdyqpen júrip jatyr. Qabyldanǵan sharalardyń arqasynda Buqar Jyraý aýdanynda eldi mekenderdiń basym bóligin sý basýdan qorǵap qaldyq. 8 kentti, onyń ishinde 2015 jyly apatty saldary bolǵan Ǵabıden Mustafın aýylyn sý basýdan saqtap qaldyq. Jergilikti atqarýshy organ qyzmetkerleri TJD qyzmetkerlerimen birlesip jedel jumys júrgizdi.
«Chkalovo, Sadovoe kentterinde 83 úıdi sý basty. Bul jerde júıeli sharalar qabyldamasa bolmaıdy. Máseleni taldap, sheshim usyný tapsyryldy. Bul óte kúrdeli másele. Chkalovodaǵy jaǵdaıdy retteýge bolatyn bolsa, Sadovoede jaǵdaı barynsha kúrdeli. Kentke sý eki jaqtan kelip jatyr. Ony dambamen tolyq bógeý óte qıyn. Halyqty kóshirý qajet. Bul da kúrdeli másele. Tapsyrma berdim. Problemany sheshý jolyn tabamyz», - dedi jýrnalısterge Qoshanov. 
Shyǵynǵa qatysty oblys ákimi osy aptada baǵalaý komıssııasyna jumysty aıaqtaýdy tapsyrdy. 20 mamyrǵa deıin ótemaqyny tolyqtaý tóleý qajet.
