Sý tasqynynan zardap shekken Eltaı aýylynda jańa úıler salynatyn boldy

Qaıta salynatyn 5 turǵyn úıge «Shymkent qaıyrymdy qala» áleýmettik qorynan qarajat bólinip otyr, dep habarlaıdy QazAqparat tilshisi.

Qala ákiminiń orynbasary Baýyrjan Mamytalıev atalǵan eldi mekenniń turǵyndarymen kezdesý barysynda turǵyn úılerdiń qurylys jumystary osy aptanyń sońynda bastalatynyn atap ótti.

«Qurylys kompanııalaryna úılerdi bir jarym aıda salp bitirýdi tapsyrdyq. Budan bólek, sý basqan 32 úıdiń zaqymdanǵany týraly komıssııa sheshim shyǵaratyn bolsa, áleýmettik qordan qalpyna keltirý jumystaryna tıisti qarajat bólemiz»,-dedi B.Mamytalıev.

Sondaı-aq, qala ákiminiń orynbasary sý basqan aýlalar men kóshelerdi tazartý jumystarynyń barysyn tekserdi. Eltaı aýylyna qazir sý kelip jatqan joq. Qalpyna keltirý jumystary qarqyndy júrip jatyr. Bul jumystarǵa Shymkent qalasy Tótenshe jaǵdaılar departamentiniń 48 qyzmetkeri, 3 tehnıka men 1 motopompa jumyldyrylǵan. Órt sóndirý bólimderiniń ókilderi sý basqan aýla, aýmaqtardan, kóshelerden batpaq laı men tastardy shyǵaryp jatyr. Aýyl mańyndaǵy aryqtar jınalǵan qoqystardan tazartylýda. Sondaı-aq olar búginge deıin uzyndyǵy 30 metr bolatyn eki kóshe men 48 úıdiń aýlasyn laıdan tazartqan.