Sý tasqynynan zardap shekken Aqtóbe turǵyndaryna ótemaqy tóleý bastalady
AQTÓBE. QazAqparat - Aqtóbede kóktemgi sý tasqynynan zardap shekken otbasylar búlingen múlik úshin ótemaqy alady. Aqsha kelesi aptada esepshotqa aýdarylady, dep habarlaıdy QazAqparat tilshisi.
Aqtóbede kóktemgi sý tasqyny kezinde 140-tan astam úı zaqymdandy. Onyń 22-inde jyljymaıtyn múlik qujaty joq.
«Qujaty joq úı ıelerine ótemaqy berilmeıdi. Biz aldymen olardyń qujatyn retteýge keńes berdik. Qujattaryn rettegen soń baǵalaýshy kompanııa óz jumysyn jalǵastyrady. Tólem bıýdjetten berilmeıdi, bıýdjetten tys bolady. Qalǵan úılerge 127 mln teńge kóleminde qarjyny qalalyq bıýdjetten beremiz. Kelesi aptada aýdarylady. Bul jóndeý jumystaryna beriledi. 100 myń teńgeden bastap, 4 mıllıon teńgege deıin bar. Shyǵyndardy ashyq kórsetemiz»,- dedi qala ákimi Ashat Shaharov.
Málim etilgendeı, isten shyqqan tehnıka úshin aqsha berilmeıdi. Sebebi zańbuzýshylyq bolyp sanalady.
«Onyń aldynda demeýshiler adam basyna 100 myń teńge tóledi. Turmystyq tehnıkany sol arqyly alýǵa múmkindik boldy. Alǵashynda barlyq adam ýaqytsha ornalasý beketterinde boldy. Úıi jaramsyz bolyp qalǵan adamdar qazir jataqhanada turyp jatyr»,- dedi qala ákim.
Eske salaıyq, bıylǵy kóktemde erigen qar sýynyń tasqyny adam ómirine de qaýip tóndirgen bolatyn. Aqtóbedegi «Batys-2» shaǵynaýdanynda aǵyp jatqan laı sýǵa qyz bala qulap ketip, onyń ómirin kómekke jetken er adamdar qutqaryp qalǵan edi.
