Sý tasqynynan zardap shekken aqmolalyqtar 50 mln teńgege qaıyrymdylyq kómek aldy
KÓKShETAÝ. QazAqparat - Aqmola oblysynda kóktemgi sý tasqynynan zardap shekkenderge barlyǵy 50 mıllıonnan astam teńgege qaırymdylyq kómek kórsetildi, dep habarlaıdy «QazAqparat» HAA tilshisi.
«Qazaq tili men mádenıeti» qoǵamdyq birlestiginiń málimeti boıynsha, arnaıy ashylǵan esepshotqa túsken qarjynyń bir bóligi tasqyn sýdan zardap shekken Atbasar, Sandyqtaý, Tselınograd jáne Astrahan aýdandaryna bólinip otyr.
Jalpy, 2017 jyldyń 20 sáýiri men 7 maýsymy aralyǵynda «Qazaq tili men mádenıeti» qoǵamdyq birlestiginiń qaırymdylyq esepshotyna 90 mıllıon 123 myń teńge qarjy túsken.
Shyǵyndar boıynsha usynylǵan anyqtamalardy jáne zardap shekken aýdandarǵa tabıǵı apat saldaryn joıýǵa bıýdjetten bólingen qarajattardy eskere, 30,5 mıllıon teńgeni Atbasar aýdanyna, 7,6 mıllıon teńgeni Sandyqtaý aýdanyna, 7,2 mln teńgeni Astrahan aýdanyna, 10 mıllıon teńgeni Tselınograd aýdanyna bólýdi jón kórdik» - dedi komıssııa tóraǵasy Meırambek Qıyqov.
Sonymen qatar, qazirgi kezde qorda qalǵan 35 mıllıon 823 myń teńge qarjy bar. Oǵan qosa, taǵy qosymsha qarajat túsýde.
Eske sala keteıik, bıylǵy kóktemgi sý tasqyny kezinde Aqmola oblysynyń Atbasar qalasynda 454 úı sý astynda qalǵan bolatyn. Onyń 36-sy buzylsa, 184 úı kúrdeli jóndeýdi qajet etedi.
Sandyqtaý aýdanynda 257 turǵyn úı, Astarhan aýdanynda 107 turǵyn úı, Tselınograd aýdanynda 28 turǵyn úı zardap shekti.
