Sý tasqynynan tıimdi qorǵaný úshin arnaıy baǵdarlama qajet - I. Ábishev
ASTANA. 11 sáýir. QazAqparat - Elimizdiń kóptegen óńirlerine qaýip tóndirip otyrǵan sý tasqynynan qorǵaný úshin arnaıy baǵdarlama qabyldaý qajet.
Bul týraly Parlament Senatynyń Óńirlik damý jáne tabıǵatty paıdalaný komıtetiniń keńeıtilgen otyrysy barysynda Aýyl sharýashylyǵy mınıstrligi Sý resýrstary komıtetiniń tóraǵasyIslam Ábishev málim etti.
Komıtet tóraǵasynyń aıtýynsha, sońǵy úsh jyldyń ishinde respýblıka boıynsha bolǵan sý tasqynynyń saldarynan 12 myńǵa jýyq qurylys nysandary zardap shegip, memleket tarapynan 50 mlrd. teńge jumsaldy. Onyń syrtynda qaıyrymdylyq qorlary men demeýshilikten túsken mıllıondaǵan qarajat taǵy bar. «Men ózim ońtústik óńirdi jaqsy bilemin. Ol jerde sý tasqynynyń aldyn alýǵa bolady. Mysaly, jazyq jerde ornalasqan bir aýyldy alsaq, osy aýyldy qorshap, bıiktigi 1,5 metr bolatyn qorshaý jasasaq, biraz qarajatty únemdeýge bolady. Onyń quny 4-5 mln. teńgeden aspaıdy. Sonda myń eldi mekendi osylaı qorshap alsaq, 4-5 mlrd. teńgege barlyq sharýany tyndyra alamyz. Sol sııaqty taýly jerlerde de topyraqtan shaǵyn dambalar turǵyzýǵa bolady. Bizdiń basty problemamyz - sý tasqynymen qańtar-aqpan aılarynda aınalysamyz. Menińshe, bul jumysty turaqty túrde atqarý qajet. Negizi, bizde sý tasqynyna qarsy naqty baǵdarlama ázirlenýi tıis», - dedi ol.
